विश्व खबर 
काठमाडौं– नेपाली बजारमा सुनको मूल्यले फेरि नयाँ कीर्तिमान कायम गरेको छ ।
शुक्रबार प्रतितोला सुनको मूल्य २ लाख ६ सय रुपैयाँ पुगेको छ ।
जुन हालसम्मकै उच्च हो ।
अघिल्लो दिनको तुलनामा सुन १२ सय रुपैयाँले बढेको हो ।
यसअघि साउन २३ गते प्रतितोला १ लाख ९९ हजार ४ सय रुपैयाँमा पुगेको सुनको मूल्य करिब तीन सातामै तोडिएको छ ।
सुनसँगै चाँदीको मूल्य पनि बढेको छ ।
नेपाल सुनचाँदी व्यवसायी महासंघका अनुसार चाँदी प्रतितोला ५ रुपैयाँले बढेर २३६० रुपैयाँ पुगेको छ ।
किन बढ्दैछ सुनको भाउ ?
विश्व बजारमा अमेरिकन डलर कमजोर हुँदै जानु र तेल मूल्य बढ्नुका कारण लगानीकर्ताले सुरक्षित विकल्पका रूपमा सुन रोजिरहेका छन् ।
त्यस्तै विश्वका विभिन्न क्षेत्रमा बढ्दो अस्थिरताले सुनमा माग बढाएको छ ।
नेपालमा दशैं–तिहारजस्ता चाडपर्व नजिकिँदै गर्दा सुनको माग बढ्ने परम्परा छ ।
जसले मूल्यलाई थप चुल्याएको छ ।
नेपाली अर्थतन्त्रमा असर
सुनको मूल्य महँगिँदा यसको आयात लागत बढ्छ ।
जसले व्यापार घाटा थप बढाउने खतरा छ ।
सामान्य उपभोक्ताले गहना खरिद गर्न अझै महँगो पर्नेछ ।
बैंकमा पैसा राख्नेभन्दा सुनमा लगानी सुरक्षित देख्ने प्रवृत्ति अझ बढ्न सक्छ ।
नेपाल सुनचाँदी व्यवसायी महासंघका एक पदाधिकारीका अनुसार सुनको मूल्य निकट भविष्यमा अझै उतार–चढाव हुने सम्भावना छ ।
