काठमाडौं– प्रतिनिधिसभाकी उपसभामुख इन्दिरा रानामगरविरुद्ध महाअभियोग प्रस्तावका लागि कांग्रेसले हस्ताक्षर संकलन सुरु गरे पनि डा.शेखर कोइराला निकटका सांसदहरूले हस्ताक्षर गर्न अस्वीकार गरेका छन् ।
उनीहरूले प्रयोजन नखुलेको भन्दै खाली कागजमा हस्ताक्षर नगर्ने बताएका हुन् ।
प्रमुख सचेतक श्यामकुमार घिमिरेले सांसदहरूलाई बोलाए पनि कोइराला पक्षका सांसदहरूले ‘प्रयोजन स्पष्ट भएपछि मात्रै हस्ताक्षर गर्ने’ अडान लिएका छन् ।
सांसद कान्छाराम तामाङले यसबारे कोइरालासँग सल्लाह गरेका थिए भने हृदयराज थानी, सरिता प्रसाईँ, दीपक गिरीलगायतलाई पनि कोइरालाले हस्ताक्षर नगर्न सुझाव दिएका थिए ।
स्रोतका अनुसार सोमबार साँझ प्रधानमन्त्री निवास बालुवाटारमा कांग्रेस–एमालेबीच उपसभामुखले पदअनुसार आचरण नगरेको भन्दै महाअभियोग लगाउने सहमति भएपछि दुवै दलले आफ्ना सांसदहरूमध्ये हस्ताक्षर सङ्कलन थालेका हुन् ।






















