काठमाडौं– सशस्त्र प्रहरी सहायक निरीक्षक (असई) थमन विकको हत्यामा फरार प्रतिवादी देवेन्द्र यादव हाल नेपाली कांग्रेसमा प्रवेश गरेका छन् ।
कांग्रेस सभापति शेरबहादुर देउवाले बिहीवार यादवलाई पार्टीमा स्वागत गरेका थिए ।
कार्यक्रममा कांग्रेसका महामन्त्री विश्वप्रकाश शर्मा, सहमहामन्त्री महेन्द्र यादव, महोत्तरी ४ का सांसद महेन्द्रकुमार राय, मधेश प्रदेश सभापति कृष्ण यादव र महोत्तरी सभापति नागेश्वर यादव उपस्थित थिए ।
विक हत्याकाण्डको मुख्य अभियुक्त यादव प्रहरीको फरार सूचीमा छन् ।
महोत्तरी जिल्ला अदालतले उनको मुद्दा मुलतवीमा राखेको छ ।
२०७२ भदौ २५ गते मधेश आन्दोलनका क्रममा विकको हत्या भएको थियो ।
महोत्तरी जिल्ला अदालतले २०८० मंसिर २८ गते सात जनालाई जन्मकैदको सजाय सुनाएको थियो ।
फरार अभियुक्तमा अभिराम शर्मा, रामशंकर मिश्र, देवेन्द्र यादवसहित अन्य १९ जनाको नाम छ ।
यसअघि फरार अभियुक्त लक्ष्मी महतो कोइरीले प्रतिनिधि सभामा उम्मेदवारी दिएर चुनाव जिते पनि उनी फरार रहँदा प्रहरीले मुद्दा अघि बढाएको थियो ।
विकको हत्या प्रकरणमा केही अभियुक्त थुनामा छन् भने अधिकांश फरार छन् र केहीको फैसला मुलतवी राखिएको छ ।






















