काठमाडौं– राष्ट्रपति रामचन्द्र पौडेलले चीनमा हुने सांघाई कोअपरेसन अर्गनाइजेसन (एससीओ) शिखर सम्मेलनमा सहभागी हुन अस्वीकार गरेपछि प्रधानमन्त्री केपी शर्मा ओली उक्त सम्मेलनमा जाने भएका छन् ।
राष्ट्रपति पौडेलको इच्छा भए पनि उनका स्वकीय, सल्लाहकारहरूले चीनसँग दूरी राख्ने सुझाव दिँदै भ्रमण रोकेको स्रोतले दाबी गरेको छ ।
पौडेलले यसअघि बीआरआईदेखि सैन्य मार्चसम्मका चिनियाँ निमन्त्रणा अस्वीकार गरेका थिए ।
प्रधानमन्त्री ओलीलाई १५ दिनअघि मात्र चीनले निम्ता गरेको हो ।
सी चिनफिङसँग भेटको समय पक्का भएपछि ओलीको भ्रमण टुंगिएको हो ।
उनी १४ भदौमा चीन पुग्नेछन् र १८ भदौमा सीसँग भेट्नेछन् ।
यस क्रममा उनले भारतीय प्रधानमन्त्री नरेन्द्र मोदीसँग पनि भेट गर्नेछन् ।
जसलाई भारतसँग सम्बन्ध सहज बनाउन महत्त्वपूर्ण मानिएको छ ।
एससीओको पाँचौँ राष्ट्र प्रमुखस्तरीय सम्मेलन १५–१६ भदौमा चीनमा हुँदैछ ।
नेपाल स्थापनाकालदेखि नै एससीओसँग जोडिएको भए पनि सदस्य बन्न सकेको छैन ।
हाल ‘डायलग पार्टनर’को हैसियतमा छ ।
यसअघि नेपालभन्दा पछि जोडिएका कतिपय मुलुक सदस्य भइसकेका छन् ।
स्थापनाकालमा भारतले नेपाललाई एससीओमा जोडिन नदिन प्रयास गरे पनि तत्कालीन प्रधानमन्त्री गिरिजाप्रसाद कोइरालाले त्यो दबाब अस्वीकार गरेका थिए ।






















