विश्व खबर 
हेटौंडा– बागमती प्रदेशमा मन्त्री नियुक्ति विवादका कारण मुख्यमन्त्री इन्द्रबहादुर बानियाँको सरकार अझै पूर्णता पाउन सकेको छैन ।
कांग्रेसभित्र बानियाँ र पूर्व मुख्यमन्त्री बहादुरसिंह लामाबीच ३ जना मन्त्री नियुक्ति विषयमा मतभेदले संकट पैदा भएको हो ।
२० साउनमा नियुक्त बानियाँले एमालेका ६ र कांग्रेसका २ मन्त्री मात्र बनाएका छन् ।
बाँकी ५ मन्त्रालय कांग्रेसको भागमा छन् ।
तर, लामाले आफ्नो कार्यकालमा नियुक्त गरेका तर सपथ नखुवाइएका गोविन्द लम्साल, माया श्रेष्ठ र गीता गुरुङलाई मन्त्री बनाउनुपर्ने सहमति बानियाँले पालना नगरेको लामा पक्षको आरोप छ ।
यो विषय टुंग्याउन बानियाँ बुधबार काठमाडौं पुगेका छन् ।
आज शीर्ष नेतासँग छलफल गर्ने तयारीमा छन् ।
उनले शुक्रबार मन्त्रिपरिषद् विस्तार गर्ने योजना बनाएका छन् ।
बानियाँ निकट सांसदहरूले भने लामा पक्षका ३ जनालाई मन्त्री बनाउने कदम आफ्ना २२ समर्थक सांसदका लागि अन्याय हुने भन्दै दबाब दिइरहेका छन् ।
बानियाँ, जसले लामाको नेतृत्वमा रहेको सरकारलाई अविश्वास प्रस्तावमार्फत हटाएका थिए ।
एमालेसँग मिलेर मुख्यमन्त्री बनेका हुन् ।
२० साउनमा उनी बागमतीका छैटौं मुख्यमन्त्री बनेका थिए ।
