काठमाडौं– प्रतिनिधिसभाको राज्य व्यवस्था तथा सुशासन समितिका सभापति रामहरि खतिवडाले मंगलबार राजीनामा दिएपछि कांग्रेसले नयाँ सभापति छान्ने तयारी थालेको छ ।
२०८० वैशाखमा भएको भागबन्डाअनुसार यो समितिको नेतृत्व कांग्रेसको भागमा परेको थियो ।
‘संघीय निजामती सेवा विधेयक’को दफा ८२ मा भएको त्रुटि र त्यसबारे विशेष छानबिन समितिको प्रतिवेदन सार्वजनिक भएको सात दिनपछि खतिवडाले नैतिक कारण देखाउँदै राजीनामा दिएका हुन् ।
पार्टीबाट कुनै दबाब नआएको उनले दाबी गरे ।
अब कांग्रेसका ९ सदस्यमध्ये महामन्त्री विश्वप्रकाश शर्मा, दीलेन्द्र प्रसाद बडू, हृदयराम थानी, ईश्वरीदेवी न्यौपाने र सहमहामन्त्री जीवन परियार सभापतिका आकांक्षी बनेका छन् ।
न्यौपाने अहिले संसदीय सुनुवाइ समितिकी सभापति हुन् भने परियार विशेष छानबिन समितिका पूर्वसभापति हुन् ।
शर्मा प्रभावशाली पदमा काम देखाउने इच्छामा छन् तर पार्टी सभापति शेरबहादुर देउवासँगको दूरीका कारण सम्भावना कमजोर देखिन्छ ।
बडू र न्यौपाने देउवाको पक्षमा नरम छन् भने थानीलाई खड्कासँगको आन्तरिक टकरावले कमजोर बनाएको स्रोतले बताएको छ ।
परियार हाल कानुन, न्याय तथा मानवअधिकार समितिका सदस्य छन् र समितिमा सरुवा भएर सभापति बन्न इच्छुक छन् ।






















