विश्व खबर 
काठमाडौं– बागमती कांग्रेसभित्रको आन्तरिक विवादले मुख्यमन्त्री इन्द्रबहादुर बानियाँलाई विश्वासको मत लिन चुनौती सिर्जना गरेको छ ।
बहादुरसिंह लामालाई हटाएर २० साउनमा नियुक्त भएका बानियाँ आज (मंगलबार) विश्वासको मत लिने तयारीमा छन् ।
सत्तारूढ कांग्रेस–एमालेबीचको समझदारीअनुसार पहिलो दुई वर्ष कांग्रेसको नेतृत्व रहने भएपछि लामा एक वर्षअघि मुख्यमन्त्री बनेका थिए ।
तर, पार्टीभित्रको शक्ति संघर्षका कारण उनी पदमुक्त भए ।
बानियाँ समूहले लामालाई संसदीय दलको नेताबाट हटाएपछि १८ साउनमा उनले राजीनामा दिए ।
देउवाको मध्यस्थतामा लामा–बानियाँबीच लामा नियुक्त तर शपथ नलिएका तीन मन्त्रीलाई निरन्तरता दिने सहमति भएको थियो ।
उनीहरू लामा निकटका हुन् ।
हाल १४ मन्त्रालयमध्ये कांग्रेसका भागमा ८ र एमालेका भागमा ६ मन्त्रालय छन् ।
एमालेले सबै मन्त्री पठाइसकेको छ भने कांग्रेसले दुई मन्त्री मात्र पठाएको छ । उनीहरू दुवै बानियाँ निकट मानिन्छन् ।
लामा पक्षले आफ्ना तीन मन्त्रीको नियुक्ति नभएसम्म विश्वासको मत नदिने चेतावनी दिएको छ ।
११० सदस्यीय प्रदेशसभामा बहुमतका लागि ५६ मत आवश्यक छ ।
कांग्रेसका ३७ र एमालेका २४ मत भए पनि कांग्रेसभित्र १४ सांसद असन्तुष्ट छन् ।
असन्तुष्ट पक्ष सहमतिमा नआए बानियाँको पद संकटमा पर्न सक्छ ।
बानियाँ पक्ष भने ह्वीप लागू भएकाले विश्वासको मत पक्का हुने दाबी गर्दैछ ।
प्रतिक्रिया दिनुहोस्