काठमाडौं– नेकपा (माओवादी केन्द्र)का वरिष्ठ उपाध्यक्ष नारायणकाजी श्रेष्ठले नेकपा (एकीकृत समाजवादी)का सम्मानित नेता तथा पूर्वप्रधानमन्त्री झलनाथ खनालसँग भेटवार्ता गरेका छन् ।
डल्लुस्थित खनालको निवासमा भइरहेको भेटमा दुई नेताबीच नेपालको वर्तमान राजनीतिक परिस्थिति, वाम एकताको आवश्यकता तथा सम्भावनाबारे विस्तृत चर्चा भएको जनाइएको छ ।
पछिल्लो समय श्रेष्ठले राजनीतिक भेटघाट र छलफलको क्रम तीव्र पारेका छन् ।
हालसालै उनले नेपाल कम्युनिस्ट पार्टीका महासचिव नेत्रविक्रम चन्द ‘विप्लव’सँग भेट गरेका थिए ।
शुक्रबार मात्र एकीकृत समाजवादीका महासचिव घनश्याम भुसालसँग पनि कुराकानी गरेका थिए ।
पछिल्लो समय माओवादी अध्यक्ष प्रचण्डका विश्वास पात्र मानिने श्रेष्ठको नेताहरूसँगको बाक्लो उठबस जारी छ ।
यद्यपि दलीय एकताका लागि गरिएको प्रयासको परिणाम शून्यजस्तै छ ।
हालसम्म कुनै प्रगति नभएको श्रेष्ठ स्वीकार्छन् ।






















