काठमाडौं– करिब नौ वर्षपछि एमाले मुख्यालय च्यासलमा प्रवेश गर्दै पूर्वराष्ट्रपति र एमालेकी पूर्वउपाध्यक्ष विद्यादेवी भण्डारीले सक्रिय राजनीतिमा पुनरागमनको घोषणा गरेकी छन् ।
उनले पार्टी सदस्यता नवीकरण गरिसकेको बताउँदै पार्टी नेतृत्वमा समेत योगदान गर्न इच्छुक रहेको संकेत दिएपछि एमाले भित्रको राजनीति तातेको छ ।
उनको सक्रियताबारे पार्टीभित्र मिश्रित प्रतिक्रिया आए ।
एकातिर स्वागत, अर्कातिर विरोध ।
यस्तै अवस्थामा पार्टीको सचिवालय र पोलिटब्युरो बैठक सकिएर केन्द्रीय समिति बैठक बस्न लागेको थियो ।
यसैबीच भण्डारीले साउन ४ गते प्रधानमन्त्री एवं नेकपा (एमाले) अध्यक्ष केपी शर्मा ओलीसँग च्यासलमै करिब दुई घण्टा ‘वन टु वन’ भेटवार्ता गरिन् ।
भेटपछि दुवैको अनुहारमा हाँसो देखिएको भए पनि त्यसको प्रभाव पार्टी निर्णयमा देखिएन ।
तीन दिनपछि बसेको दुईदिने केन्द्रीय समिति बैठकले भण्डारीको सदस्यता नवीकरण खारेज गर्ने निर्णय ग¥यो ।
बैठकले राष्ट्रपति वा सम्माननीय पदमा पुगेकाहरू पार्टी राजनीतिमा सक्रिय हुन नपाउने भन्दै सदस्यता नवीकरण अस्वीकार ग¥यो ।
भण्डारीले साउन ९ गते पत्रकार सम्मेलन गरेर पार्टी निर्णयप्रति असहमति जनाइन् ।
तर, अपेक्षाअनुसार आक्रोश नदेखाउँदा उनका धेरै समर्थकहरू निराश बने ।
उनका निकटका नेताहरूका अनुसार पत्रकार सम्मेलनमा ‘नरम’ देखिनु रणनीतिक हिसाबले गरिएको हो ।
भण्डारी समूह अहिले पार्टीभित्रको विवाद सार्वजनिक रूपमा नताने पनि आन्तरिक रूपमा रणनीति बनाइरहेको छ ।
उनीहरू अहिले मदन भण्डारी फाउण्डेशनलाई केन्द्र बनाउँदै आगामी गतिविधि अगाडि बढाउने तयारीमा छन् ।
मदन भण्डारीको ७५औँ जन्मजयन्तीको अवसरमा ‘हीरक महोत्सव’ आयोजना गर्ने योजना भण्डारी नेतृत्वको टोलीले बनाएको छ ।
त्यसै माध्यमबाट जबज र मदन भण्डारीका विचारलाई अगाडि सार्दै भावनात्मक रूपमा कार्यकर्तालाई जोड्ने प्रयास भइरहेको छ ।
भण्डारी समूहले फाउण्डेशनका नाममा बानेश्वर हाइटस्थित थापागाउँमा चारतले भवन भाडामा लिएर सम्पर्क कार्यालय खोल्ने तयारी गरिरहेको छ ।
त्यो भवन २०४८ सालको निर्वाचनमा मदन भण्डारीले प्रचार कार्यालय बनाएको घर हो भन्ने भावनात्मक सन्देशसहित प्रयोगमा ल्याइने बताइएको छ ।
फाउण्डेशनका गतिविधिमार्फत पार्टी सदस्यता नवीकरणलाई जनस्तरको मुद्दा बनाउने तयारी छ ।
प्रदेशस्तरमा पनि उनका समर्थकहरू अनौपचारिक रूपमा सक्रिय छन् ।
अहिले सदस्यता नपाएको भए पनि समर्थन विस्तार हुँदै गएमा निर्णय उल्टाउन सकिने विश्वास भण्डारी पक्षमा देखिन्छ ।
एक नेताका अनुसार आगामी विधान महाधिवेशनमा नै भण्डारी समूहले बेग्लै दस्तावेज पेस गर्ने तयारी गरिरहेको छ ।
त्यसका लागि संवैधानिक र कानुनी पक्षहरू अध्ययन गरी एजेन्डा तयार पारिँदै छ ।






















