विश्व खबर 
काठमाडौं– अमेरिकी पूर्वराष्ट्रपति डोनाल्ड ट्रम्पका नजिकका सहयोगी तथा ह्वाइट हाउसका पूर्वप्रशासनिक उपप्रमुख स्टिफन मिलरले भारतमाथि रूसलाई युक्रेनविरुद्धको युद्धमा आर्थिक सहयोग गरेको आरोप लगाएका छन् ।
एक टेलिभिजन अन्तर्वार्तामा मिलरले भारतले रूसबाट तेल किन्दै आएको र त्यसैमार्फत रूसलाई युद्ध खर्च गर्न आर्थिक स्रोत उपलब्ध गराएको दाबी गरेका हुन् ।
उनका अनुसार ट्रम्पको बुझाइ पनि यही हो, भारतले रूसलाई अप्रत्यक्ष रूपमा युद्धमा समर्थन गरिरहेको छ ।
’ट्रम्पले यो व्यवहार स्वीकार्य छैन भन्ने स्पष्ट धारणा राख्नुभएको छ,’ मिलरले बताएका छन् ।
तर, भारतले ट्रम्पको दबाबको बाबजुद पनि रूसबाट तेल खरिद जारी राख्ने अडान लिएको छ ।
शनिबार रोयटर्ससँग कुराकानी गर्दै भारतका दुई उच्च अधिकारीहरूले रूसी तेल खरिद दीर्घकालीन सम्झौता भएको बताउँदै यो प्रक्रिया रोक्न नसकिने प्रस्ट पारेका छन् ।
’यी सम्झौताहरू तुरुन्त खारेज गर्न सकिने खालका होइनन्,’ ती अधिकारीहरूले भने ।
अर्का एक अधिकारीका अनुसार रूसी क्रुड तेल प्रत्यक्ष रूपमा प्रतिबन्धित छैन र भारतले त्यो युरोपेली युनियनले तोकेको मूल्य सिमाभन्दा तलमै खरिद गरिरहेको छ ।
हाल भारत रूसी तेलको ठूलो आयातकर्ता बनेको छ ।
सन् २०२५ को जनवरीदेखि जुनसम्म भारतले दैनिक औसत १७ लाख ५० हजार ब्यारेल रूसी तेल आयात गरेको छ ।
जुन अघिल्लो वर्षको सोही अवधिको तुलनामा १ प्रतिशतले बढी हो ।
यता, ट्रम्पले युक्रेनमा युद्धविराम गराउने रणनीतिका रूपमा रूसबाट तेल किनेका देशमाथि उच्च भन्सार दर लगाउने चेतावनी दिएका छन् ।
यही सन्दर्भमा अगस्ट १ पछि भारतमाथि २५ प्रतिशतको नयाँ भन्सार दर घोषणा गरिएको छ ।
भारतको विदेश मन्त्रालयले भने यो विषयमा प्रत्यक्ष प्रतिक्रिया दिएको छैन ।
तर, प्रवक्ता रणधीर जैसवालले पत्रकार सम्मेलनमा भारत–रूस सम्बन्ध स्थिर र विश्वासिलो रहेको बताएका छन् ।
