images
images
  • प्रधानमन्त्री ओली संविधान लत्याउँदै, विश्वासको मत लिन छोडेर राधिकासँग विदेश उड्ने तयारी

    काठमाडौं– नागरिक उन्मुक्ति पार्टी (नाउपा)ले गत असार २२ गते सरकारबाट समर्थन फिर्ता लिएको एक महिना पुग्न लाग्दा पनि प्रधानमन्त्री केपी शर्मा ओलीले प्रतिनिधिसभाबाट विश्वासको मत लिने तयारी गरेका छैनन् ।

    नाउपाले साउन २० गतेसम्ममा समर्थन फिर्ता गरेको ३० दिन पूरा हुँदैछ ।

    संविधानको धारा १००(२) अनुसार सरकारमा सहभागी दलले समर्थन फिर्ता गरेपछि प्रधानमन्त्रीले ३० दिनभित्र विश्वासको मत लिनुपर्ने प्रावधान छ ।

    तर, ओली साउन १८ गते पत्नी राधिका शाक्यसँगै तुर्कमिनिस्तान भ्रमणमा जाने तयारीमा छन् र साउन २३ मा फर्कने छन् ।

    यसले संवैधानिक समयसीमा नाघ्ने देखिएको छ ।

    प्रधानमन्त्रीको पक्षले भने नाउपाका राज्यमन्त्री अरूण चौधरीले औपचारिक रूपमा पद नछाडेकाले विश्वासको मत आवश्यक नरहेको दाबी गरिरहेको छ ।

    चौधरीले भने आफूले प्रधानमन्त्रीलाई राजीनामा दिएको र मन्त्रालय छाडिसकेको बताउँछन् ।

    प्रधानमन्त्री कार्यालयमा उनको राजीनामा पुगेको पुष्टि छैन ।

    संघीय संसद् सचिवालयले संविधान अनुसार विश्वासको मत लिनुपर्ने जानकारी दिइसकेको छ ।

    सचिवालयका पदाधिकारीले प्रधानमन्त्रीलाई भेटेर अदालत जानसक्ने सम्भावना औंल्याउँदै मत लिन सुझाव दिएका थिए ।

    तर, ओलीले आवश्यक नठानेको एमाले स्रोतको भनाइ छ ।

    यसअघि पनि ओलीले २०७६ मा संघीय समाजवादी पार्टीले समर्थन फिर्ता गर्दा विश्वासको मत लिएका थिएनन् ।

    त्यसबेला नेकपाको स्पष्ट बहुमत थियो ।

    पछिल्ला वर्षमा प्रचण्डले भने विभिन्न अवस्थामा पाँच पटकसम्म विश्वासको मत लिइसकेका छन् ।

    यो पटक पनि संविधान उल्लंघनको आरोप लाग्ने सम्भावना बढ्दो छ ।

    प्रतिक्रिया दिनुहोस्
    images
    images