काठमाडौं– नेकपा (माओवादी केन्द्र)भित्र अध्यक्ष पुष्पकमल दाहाल ‘प्रचण्ड’ र उपमहासचिव जनार्दन शर्माबीचको विवाद तीव्र बन्दै गएको छ ।
यो अन्तरसंघर्षबीच शुक्रबार स्थायी कमिटी बैठक बस्दैछ, जसले पार्टीको आगामी दिशा तय गर्नसक्ने देखिएको छ ।
बैठकको एजेन्डा ‘आन्तरिक एकता मजबुत तुल्याउने’ भए पनि प्रचण्ड–जनार्दन टकरावकै कारण बैठक तनावपूर्ण बन्ने अनुमान गरिएको छ ।
प्रचण्डले जनार्दनलाई पार्टी छाड्न आग्रह गरिसकेको भए पनि जनार्दनले त्यसलाई अस्वीकार गर्दै नेतृत्व परिवर्तन र शुद्धीकरणको अभियान तीव्र बनाएका छन् ।
प्रचण्डले राज्य संयन्त्र प्रयोग गरेर जनार्दनलाई दबाउन खोजेको आरोप जनार्दन पक्षको छ ।
यता, प्रचण्ड पक्षले जनार्दन ‘दलाल शक्तिको उक्साहटमा पार्टी फुटाउन खोज्दैछन्’ भन्ने आरोप लगाएको छ ।
जनार्दनले नेतृत्वप्रति कडा आलोचना गर्दै पार्टीभित्र लोकतन्त्रको खडेरी, चाकडी र निरंकुशता हावी भएको बताएका छन् ।
उनले सार्वजनिक रूपमा प्रचण्डकै संरक्षणमा भ्रष्टाचार भएको आरोप पनि लगाएका छन् ।
दुवै पक्ष आ–आफ्नो पक्षमा समर्थन जुटाउँदै ध्रुवीकरणमा उत्रिएका छन् ।
विभिन्न जनवर्गीय संगठन र प्रदेश कमिटीहरूमा जनार्दन समर्थकहरू सक्रिय बन्दै गएका छन् ।
यसैबीच महाधिवेशनको समय नजिकिंदै जाँदा यो टकराव झन् चर्किने देखिएको छ ।
पार्टी सचिव राम कार्कीले माओवादी मात्र नभएर सबै पार्टीहरू आन्तरिक संकटमा रहेको बताए ।
उनले विचार सहितको बहसको आवश्यकता औंल्याउँदै अब पार्टीभित्र खुला संवाद अपरिहार्य भएको उल्लेख गरे ।
अबको स्थायी कमिटी बैठकले प्रचण्ड र जनार्दनबीचको दूरी घटाउने कि झनै टाढा बनाउने भन्नेमा सबैको चासो छ ।






















