काठमाडौं– राष्ट्रिय स्वतन्त्र पार्टी (रास्वपा)का कार्यवाहक सभापति डिपी अर्यालसहित चार जना सांसदले पार्टी सभापति रवि लामिछानेसँग भैरहवा कारागारमा छुट्टाछुट्टै भेट गरेका छन् ।
संसदीय दलको बैठक सुरु हुनुअघि उनीहरूले लामिछानेसँग छलफल गरेका हुन् ।
अर्यालसँगै सांसदहरू असिम साह, डा.चन्दा कार्की र शोविता गौतम मंगलबार भैरहवास्थित कारागार पुगेका थिए ।
उनीहरूको भेटपछिनै रास्वपाको संसदीय दल बैठक भैरहवामै सुरु भएको छ ।
भेटका क्रममा लामिछानेले पार्टीले सञ्चालन गरेको हस्ताक्षर अभियानप्रति उत्साहजनक जनसहभागिता देखिएको भन्दै खुसी व्यक्त गरेका थिए ।
उनले यो अभियानलाई थप व्यापक बनाउन नेताहरूलाई आग्रह गर्दै आफूमाथि गरिएको ‘राजनीतिक प्रतिशोध’ को सन्देश जन–जनमा पुर्याउन घरदैलो अभियान चलाउन निर्देशन दिएका थिए ।
त्यसैगरी, पार्टी सांसदहरूलाई लामिछानेले ‘नेताको घमण्ड नगरी, भुइँमान्छे बनेर जनताको कुरा सुन्ने र समस्या समाधानमा लाग्न’ सुझाव दिएका थिए ।
भेटमा सहभागी सांसद असिम साहले सभापति लामिछानेलाई पहिलेभन्दा बढी जोशिला र आत्मविश्वासी देखेको प्रतिक्रिया दिएका छन् ।
रास्वपाले हाल देशभर अभियानसहितको कार्यक्रम अघि बढाइरहेको छ ।
सभापति लामिछाने भने केही समयदेखि भैरहवा कारागारमा छन् ।






















