काठमाडौं– प्रमुख पुराना राजनीतिक दलहरू नेपाली कांग्रेस, नेकपा (एमाले) र नेकपा (माओवादी केन्द्र)ले आफ्नो सक्रिय सदस्य संख्या बढिरहेको दाबी गर्दै जनआकर्षण घटेको छैन भनेर बताएका छन् ।
एमालेले गत एक वर्षमा २८ प्रतिशत सदस्य संख्या वृद्धि भएको जनाएको छ ।
महासचिव शंकर पोखरेलका अनुसार एमालेमा १ लाख ३९ हजार नयाँ सदस्य थपिएर कुल संख्या ६ लाख ८९ हजार पुगेको छ ।
कांग्रेसले पनि क्रियाशील सदस्य संख्या ८ लाख ७० हजार ७८० पुगेको जनाएको छ ।
१४औं महाधिवेशनमा नवीकरण र नयाँ सदस्यतासहित यो संख्या पुगेको हो ।
माओवादी केन्द्रले समेत सक्रिय सदस्य संख्या गत वर्षको तुलनामा ७ प्रतिशतले बढ्ने अपेक्षा गरेको छ ।
अघिल्लो वर्ष ७ लाख ७६ हजार रहेकोमा यस वर्ष ८ लाख ३० हजार पुग्ने अनुमान गरिएको छ ।
त्यस्तै राष्ट्रिय स्वतन्त्र पार्टी (रास्वपा)को भने ३८ लाख, १० हजार ३२५ पुगेको छ । उसले यो सदस्य संख्यालाई क्रियाशिल सदस्य संख्या नै मानेको छ ।
सामाजिक सञ्जालमा नयाँ दलप्रति आकर्षण बढ्दै गएको चर्चा भइरहँदा पनि यस्ता सदस्यता विवरणले पुराना दलप्रतिको समर्थन कायमै रहेको देखिएको उनीहरूको तर्क छ ।






















