काठमाडौं– आईएफआरसीको चेतावनी बेवास्ता गर्दै कांग्रेस–एमाले गठबन्धन सरकारले नेपाल रेडक्रस सोसाइटीमा पुनः राजनीतिक भागबन्डा गरेको छ ।
महिला, बालबालिका तथा ज्येष्ठ नागरिक मन्त्रालयको पत्रअनुसार चन्द्रकला कार्की र डा.विशालकुमार भण्डारी नेतृत्वका समानान्तर कमिटी विघटन गरी ९ सदस्यीय तदर्थ समिति गठन गरिएको छ ।
तदर्थ समितिको अध्यक्षमा कांग्रेसका विनोदकुमार शर्मा, महामन्त्रीमा एमालेका मीनबहादुर मल्ल र कोषाध्यक्षमा कांग्रेसका लोकदर्शन श्रेष्ठ छन् ।
उपाध्यक्षमा हरि बराल (एमाले) छन् भने अन्य सदस्यहरूमा एमाले र कांग्रेस दुवैबाट प्रतिनिधित्व गराइएको छ ।
आईएफआरसीले राजनीतिक हस्तक्षेप रोक्न माग गर्दै चेतावनी दिँदै आएको छ ।
सुधार नगरे नेपाल रेडक्रसलाई निलम्बन गर्ने गभर्निङ बोर्डको निर्णयअनुसार जेनेभाबाट पत्राचार भइसकेको छ ।
गठबन्धनले ३३ सदस्यीय भागबन्डाको योजना बनाएको भए पनि विवाद बढेपछि हाललाई ९ सदस्यीय समिति मात्र बनाइएको हो ।






















