images
images
  • विद्याको पक्षमा खुलेका ईश्वर मौन, ओली क्याम्प छिरेका हुन् ?

    काठमाडौं– नेकपा (एमाले) को हालै सम्पन्न केन्द्रीय कमिटी बैठकमा वरिष्ठ उपाध्यक्ष ईश्वर पोखरेल अन्तिम समयमा मौन बसेका छन् ।

    बैठकको सुरूवातमा बोल्ने चाहना देखाए पनि उनले न त धारणा राखे, न त नोट अफ डिसेन्ट लेखे ।

    पूर्वराष्ट्रपति विद्यादेवी भण्डारीको पार्टी राजनीतिमा पुनरागमन रोक्ने निर्णय उक्त बैठकले गरेको हो ।

    उपाध्यक्षहरू सुरेन्द्र पाण्डे र युवराज ज्ञवालीले यसविरुद्ध कडा असहमति जनाए पनि पोखरेल मौन रहे ।

    पाण्डे र ज्ञवालीले लिखित असहमति समेत दर्ता गरेका थिए ।

    भण्डारीको पुनरागमनका पक्षमा खुलेर लागेका पोखरेल यसअघि सार्वजनिक रूपमा अध्यक्ष ओलीको कार्यशैलीको आलोचना गरिसकेका थिए ।

    तर, केन्द्रीय कमिटी बैठकमा भने नबोलेको भन्दै उनको मौनता आलोचनाको विषय बनेको छ ।

    केही नेताहरूका अनुसार बैठकमा ओली पक्षको हावी र असहिष्णु वातावरणले पोखरेलजस्ता नेताहरूलाई बोल्न अवरोध भएको हो ।

    स्रोतका अनुसार पोखरेलले बैठक अघि ओलीसँग भेट गरेर वरिष्ठ उपाध्यक्ष पद हटाइएकोमा गुनासो गरेका थिए ।

    ओलीले उमेरहदको आधारमा उक्त निर्णय गरिएको जवाफ दिएका थिए ।

    यद्यपि, पोखरेलले न त खुला विरोध गरे न त सार्वजनिक समर्थन जनाए ।

    अब पूर्वराष्ट्रपति भण्डारीलाई उनले साथ दिने हुन् वा होइनन् भन्ने प्रश्न खुलै छ ।

    बैठकमा बोल्न नपाएका स्थायी कमिटी सदस्य कर्ण थापाले भने सामाजिक सञ्जालमा आक्रोश व्यक्त गरेका छन् ।

    एमाले केन्द्रीय कमिटीको निर्णयसँगै पूर्वराष्ट्रपति भण्डारीको सक्रिय राजनीतिमा पुनरागमनको बाटो बन्द भएको देखिन्छ ।

    भण्डारीले यसबारे हालसम्म प्रतिक्रिया दिएकी छैनन् ।

    प्रतिक्रिया दिनुहोस्
    images
    images