काठमाडौं– नेकपा (एमाले)ले पूर्वराष्ट्रपति विद्यादेवी भण्डारीलाई पार्टी राजनीतिमा सक्रिय हुन प्रतिबन्ध लगाएसँगै उनले लिएको भनिएको पार्टी सदस्यता रद्द गरेको छ ।
पार्टीको केन्द्रीय कमिटीले संविधानको मर्मअनुसार राष्ट्राध्यक्ष पदमा रहेकी व्यक्तिले पुनः दलगत राजनीतिमा फर्कन नहुने निर्णय गरेको हो ।
बुधबार सार्वजनिक निर्णयमा संविधानका धारा उद्धृत गर्दै भनिएको छ, ‘राष्ट्राध्यक्षले कुनै दल विशेषको सदस्य वा नेता बन्न मिल्दैन ।’
पार्टीको भनाइमा पूर्वराष्ट्रपतिले राजनीतिमा फर्किएमा संविधान र गणतन्त्रको मर्ममा गलत सन्देश जान्छ ।
तर, उपाध्यक्षद्वय युवराज ज्ञवाली, सुरेन्द्र पाण्डे र स्थायी समिति सदस्य कर्ण थापाले यस निर्णयमा असहमति जनाएका छन् ।
थापाले निर्णय न एजेन्डामा परेको न त प्रक्रियागत भएको भन्दै राजनीतिक प्रतिवादको घोषणा गरेका छन् ।
भण्डारी पक्षधर नेताहरूले यसलाई जबज र संविधान प्रदत्त अधिकारको उल्लंघन भन्दै कानुनी प्रतिवादको तयारी थालेका छन् ।
संविधानको धारा १७ र राजनीतिक दल ऐन २०७३ अनुसार पूर्वराष्ट्रपतिलाई पनि पार्टी सदस्य बन्ने स्वतन्त्रता हुने तर्क उनीहरुको छ ।
भण्डारीले पनि प्रतिक्रिया दिँदै आफू चुप लागेर नबस्ने चेतावनी दिएकी छन् ।
उनले भनेकी छन्, ‘म माझकिराँतकी छोरी हुँ, खुट्टा कमाउँदिनँ ।’






















