विश्व खबर 
काठमाडौं– नेपाली कांग्रेसका पाँच जना पूर्वपदाधिकारीले मंगलबार सभापति शेरबहादुर देउवालाई भेट गरी आगामी १५औं महाधिवेशनका लागि सभापति उम्मेदवारको विषयमा परामर्श गरेका छन् ।
चाक्सीबारी छलफलपछि बूढानीलकण्ठ पुगेका गोपालमान श्रेष्ठ, विजयकुमार गच्छदार, विमलेन्द्र निधि, प्रकाशमान सिंह र कृष्णप्रसाद सिटौलाले देउवालाई कसैलाई सभापतिको ‘ग्रिन सिग्नल’ दिएको हो कि भनेर स्पष्ट पार्न आग्रह गरेका थिए ।
देउवाले आफूले अहिलेसम्म कसैलाई सभापतिको वचन नदिएको जवाफ दिएका छन् ।
भेटमा नेताहरूले देउवाले अघिल्ला संकटका बेला साथ दिएका नेताहरूलाई बेवास्ता गरेको गुनासो पनि राखे ।
नेताहरूले सरकारको कार्यक्षमता, गठबन्धनको स्थायित्व, भ्रष्टाचार नियन्त्रण, नियुक्ति प्रक्रियाको पारदर्शिता, रूपन्देही–३ उपनिर्वाचनलगायत विषयमा पनि छलफल गरेका थिए ।
पूर्वराष्ट्रपति विद्यादेवी भण्डारीको सक्रियता र शेखर कोइरालाको भेटवार्ताबारे पनि प्रश्न उठाइएको थियो ।
देउवाले संविधानविपरीत राष्ट्रपतिको पुनः राजनीतिक सक्रियता नहुने बताएका छन् ।
देउवा समूहभित्र उम्मेदवार चयनमा ढिलाइ भएको भन्दै नेताहरूले स्पष्ट सन्देश दिन आग्रह गरेका छन् ।
तर, देउवाले प्रधानमन्त्री बन्ने पालोको प्रतीक्षापछि मात्र महाधिवेशनतर्फ अघि बढ्ने संकेत दिएका छन् ।
प्रतिक्रिया दिनुहोस्