काठमाडौं– नेकपा (एमाले)का महासचिव शंकर पोखरेलले पार्टीको आन्तरिक विधि निर्माणमा रहेको अन्योल अन्त्य भएको दाबी गरेका छन् ।
शुक्रबार बिहान सामाजिक सञ्जाल फेसबुकमा एक टिप्पणी गर्दै उनले पार्टीको भावी योजना ‘मिसन ८४’ का लागि अब बलियो नेतृत्व र एकताबद्ध संगठन सुनिश्चित भएको बताएका हुन् ।
पोखरेलले लेखेका छन्, ‘विधि निर्माणको अन्योल अन्त्य भएको छ । मिसन ८४ का लागि बलियो नेतृत्व र एकताबद्ध पार्टी आवश्यक थियो, त्यो सुनिश्चित भएको छ ।’
उनको यो टिप्पणी एमाले सचिवालयको पछिल्लो निर्णयसँग जोडिएको छ । बिहीबार राति अबेर सम्पन्न सचिवालय बैठकले पार्टीको विधानमा महत्वपूर्ण संशोधनहरू गर्दै ७० वर्षे उमेर सीमा र दुई कार्यकालको सीमा हटाउने निर्णय गरेको हो ।
पदाधिकारी संख्या १५ पु¥याउने र केन्द्रीय कमिटीलाई २५१ सदस्यीय बनाउने निर्णय पनि गरिएको छ ।
पार्टीको ११औं महाधिवेशनका प्रतिनिधि बन्ने योग्यतासम्बन्धी प्रावधानका कारण पूर्वराष्ट्रपति विद्यादेवी भण्डारीको महाधिवेशन प्रवेशको सम्भावना बन्द भएको राजनीतिक सन्देशसमेत उक्त निर्णयले दिएको छ ।
भण्डारी एमाले नेतृत्वमा फर्कन प्रयासरत रहेको चर्चा भइरहेका बेला उक्त निर्णय आएको हो ।
यी परिवर्तनसँगै अध्यक्ष केपी शर्मा ओलीको पुनः नेतृत्व निर्विवाद हुने प्रष्ट देखिएको छ। पोखरेलले विधि निर्माणको अन्योल हटेको भन्नुको अर्थ ओलीकै नेतृत्वमा महाधिवेशन अघि बढ्ने सुनिश्चितता भएको बुझिन्छ।






















