काठमाडौं– नेपाल कम्युनिष्ट आन्दोलनमा फेरि एकपटक दुई धारा एक हुने औपचारिक सहमति भएको छ । नेकपा (एकीकृत समाजवादी) र ‘नेकपा एकता राष्ट्रिय अभियान’ नामक समूहबीच पार्टी एकता गर्ने लिखित सहमति भएको छ ।
एकीकृत समाजवादी अध्यक्ष माधवकुमार नेपाल र एकता राष्ट्रिय अभियानका अध्यक्ष वामदेव गौतमले आज (शुक्रबार) (असार २७ गते) एक संयुक्त वक्तव्य जारी गर्दै दुवै पक्षबीच राजनीतिक दर्शन, सिद्धान्त, कार्यक्रम, रणनीति र कार्यशैलीमा समानता रहेको पुष्टि गरेका छन् ।
साथै नेपालका कम्युनिष्ट आन्दोलनलाई सुदृढ र एकीकृत बनाउनु आजको ऐतिहासिक आवश्यकता भएको उल्लेख गर्दै दुवै पक्ष एक हुने निर्णयमा पुगेको जनाएका छन् ।
सहमति अनुसार आगामी साउन २ गते राष्ट्रिय सभा गृहमा एक भव्य समारोहको आयोजना गरी पार्टी एकताको औपचारिक घोषणा गरिने छ ।
जारी संयुक्त वक्तव्यमा भनिएको छ, ‘नेपालको कम्युनिष्ट आन्दोलनलाई आत्मालोचनात्मक एकताबाट अघि बढाउनु आजको ऐतिहासिक आवश्यकता हो । यसै सन्दर्भमा एकीकृत समाजवादी र नेकपा एकता राष्ट्रिय अभियानबीच एकता हुने सहमति गरिएको हो ।’
सम्झौतापत्रमा अध्यक्ष वामदेव गौतम र अध्यक्ष माधवकुमार नेपाल दुवैको हस्ताक्षर रहेको छ । पूर्वउपप्रधानमन्त्रीसमेत रहेका गौतमले नेकपा विभाजनपछि अलग अभियान सुरु गरेका थिए ।
उनले नेकपा (एमाले), माओवादी केन्द्र र एकीकृत समाजवादीबीच तीन पटकसम्म एकता प्रयास गरे पनि सफल भएका थिएनन् । पछिल्लो समय उनले ’नेकपा एकता राष्ट्रिय अभियान’ मार्फत सैद्धान्तिक र संगठनात्मक एकता खोज्ने बताउँदै आएका थिए ।
यसबीच एकीकृत समाजवादी अध्यक्ष माधव नेपालले पनि पार्टी विस्तार र पुनर्संयोजनमा जुटिरहेका थिए । लामो समयदेखि यी दुई नेताबीच पुनः सहकार्यको सम्भावना चर्चा हुँदै आएको थियो ।
यो एकता सहमतिलाई आगामी निर्वाचनहरू र वाम गठबन्धन निर्माणतर्फ एक महत्वपूर्ण संकेतको रूपमा लिइएको छ । गौतम र नेपाल दुवै पूर्व एमालेका प्रभावशाली नेता हुन् ।
























