विश्व खबर 
काठमाडौं– रुसले युक्रेनको डाच्ने गाउँ कब्जा गरेको दाबी गरेलगत्तै अमेरिकी राष्ट्रपति डोनाल्ड ट्रम्पले सोमबार युक्रेनलाई थप हतियार सहयोग गर्ने घोषणा गरेका छन् ।
केही दिनअघि मात्रै वासिङ्टनले हतियार ढुवानी रोकिएको जनाएको थियो ।
तीन वर्षदेखि जारी रुस–युक्रेन युद्धमा हालै रुसले डनिप्रोपेत्रोभस्क क्षेत्रमा सैन्य उपस्थितिलाई विस्तार गरेपछि युक्रेनले गम्भीर दबाब महसुस गरिरहेको छ ।
ट्रम्पले युक्रेनलाई ‘मुख्यतः रक्षात्मक हतियार’ आवश्यक भएको बताए ।
रुसले हालै युक्रेनी सैन्य भर्ती केन्द्रहरूमा मिसाइल र ड्रोन आक्रमण तीव्र पारेको छ भने किएभले पनि मस्कोमा रुसी गोला–बारुद कारखाना लक्षित गरी आक्रमण गरेको दाबी गरेको छ ।
यसैबीच, युक्रेनी राष्ट्रपति जेलेन्स्कीले हवाई सुरक्षा नै जीवन रक्षा गर्ने प्रमुख उपाय भएको भन्दै अन्तर्राष्ट्रिय साझेदारहरूमाथि भरोसा रहेको बताए ।
माइकोलाइभ सहरमा भएको आक्रमणमा एक व्यक्ति घाइते भएको पुष्टि गरिएको छ ।
डनिप्रोपेत्रोभस्क क्षेत्र औपचारिक रूपमा रुसले दाबी गरेका पाँच क्षेत्रमध्ये नपरे पनि त्यस क्षेत्रमा रुसी उपस्थितिले युद्धको रुपान्तरण र रसद समस्यामा ठूलो असर पार्न सक्ने विश्लेषकहरूको भनाइ छ ।
