काठमाडौं– राष्ट्रिय स्वतन्त्र पार्टीकी सांसद सोबिता गौतमले प्रधानमन्त्री केपी शर्मा ओली सहभागी स्पेन भ्रमणको कार्यक्रममा केही सहभागीहरू फर्किन नसकेको विषय उठाउँदै गम्भीर चिन्ता व्यक्त गरेकी छन् ।
मंगलबारको प्रतिनिधिसभा बैठकमा बोल्दै उनले भनिन्, ‘सम्माननीय प्रधानमन्त्री जानुभएको स्पेनको कार्यक्रममा समेत केही मानिसहरू कार्यक्रममा सहभागी हुने बहानामा गएका तर नफर्किएको समाचारहरू आएका छन् । व्यक्ति विशेष कसैलाई लक्षित गर्ने होइन, तर विषय गम्भीर छ ।’

प्रधानमन्त्री ओली असार १४ गते राष्ट्रसंघका महासचिव एन्टोनियो गुटेरस र स्पेनका प्रधानमन्त्री पेड्रो सान्चेजको निमन्त्रणमा ‘इन्टरनेशनल कन्फरेन्स अन फाइनान्सिङ फर डेभलपमेन्ट अफ युनाइटेड नेशन्स (एफएफडि–४)’ मा सहभागी हुन स्पेनको सेभिल्ला पुगेका थिए ।
उनी भ्रमण सम्पन्न गरी स्वदेश फर्किसकेका छन् । तर, सो भ्रमणमा सहभागी केही व्यक्तिहरू स्वदेश नफर्किएको समाचार सार्वजनिक भएपछि सांसद गौतमले संसद्मा प्रश्न उठाएकी हुन् ।
गौतमले भिजिट भिसाका नाममा हुने दुरुपयोग र त्यसमा संलग्नहरूबारे सत्यतथ्य छानबिन गर्न उच्चस्तरीय समिति गठनको माग गरिन् ।























