images
images
  • चर्चामा असार १४ : एमालेको आगामी नेतृत्वका लागि ओली–भण्डारीको शक्ति संघर्ष सतहमा

    काठमाडौं– नेकपा (एमाले)का तत्कालीन महासचिव मदन भण्डारीको ७४औँ जन्मजयन्तीको अवसरमा मदन भण्डारी फाउन्डेसनले असार १४ गते ‘जनताको बहुदलीय जनवाद (जबज)का तीन दशक’ विषयक राष्ट्रिय गोष्ठी आयोजना गर्दैछ । फाउन्डेसनले यसपालि ७७ वटै जिल्लामा पनि कार्यक्रम गरिने जनाएको छ ।

    यो कार्यक्रमलाई ओली र पूर्वराष्ट्रपति विद्यादेवी भण्डारीबीचको आन्तरिक प्रतिस्पर्धाको सन्दर्भमा पनि हेरिएको छ । अतीतमा माधव नेपाल र झलनाथ खनालविरुद्ध गुटबन्दी गर्न प्रयोग भएको यो फाउन्डेसन अहिले ओलीविरुद्ध भण्डारीपक्षले प्रयोग गर्न थालेको एमालेभित्र भनिन्छ ।

    असार १४ मा हुने कार्यक्रममा प्रधानमन्त्री तथा अध्यक्ष केपी शर्मा ओली प्रमुख अतिथि रहने छन् भने मदन भण्डारी हीरक महोत्सव सुरु गरिनेछ, जसको नेतृत्व वरिष्ठ उपाध्यक्ष ईश्वर पोखरेलले गर्ने तयारी छ । यो महोत्सव एक वर्षसम्म चल्नेछ ।

    त्यसैबीच एमालेले भदौ २०–२२ मा विधान महाधिवेशन गर्ने तयारी गरिरहेको छ । यो महाधिवेशनमा ७० वर्षे उमेरहद र दुई कार्यकालको सीमा हटाउने वा कायम राख्ने विषयमा बहस केन्द्रित हुने देखिन्छ । ओली पक्ष उमेरहद हटाएर आफूलाई पुनः अध्यक्ष बन्ने बाटो खोल्न चाहन्छ भने भण्डारी पक्ष त्यो रोक्न चाहन्छ ।

    पूर्वराष्ट्रपति भण्डारी सक्रिय राजनीतिमा फर्कन चाहन्छिन् तर पार्टीको विधानले उनलाई रोकेको छ । यही कारण फाउन्डेसनको माध्यमबाट महाधिवेशनसम्म बहसको वातावरण बनाउने रणनीति भण्डारी पक्षको रहेको बुझिएको छ । हीरक महोत्सवको अभियानमार्फत जबजलाई व्यवहारमा उतार्नुपर्ने भन्दै पार्टीभित्र वातावरण बनाउने योजनासमेत रहेको भण्डारीपक्षका नेताहरू बताउँछन् ।

    यता ओली पक्षले भने महाधिवेशनबारे हालसम्म पार्टीमा कुनै निर्णय नभएको भन्दै सामाजिक सञ्जालमा ओली नै पुनः अध्यक्ष बन्ने भन्दै प्रचार थालेका छन् । २५ जेठमा अनेरास्ववियु महाधिवेशनमा ओलीले ‘ग्रुपबाजीको हल्ला चलाएर पार्टीलाई कमजोर पार्न खोजिएको’ भन्दै आक्रोश व्यक्त गरेका थिए ।

    एमाले उपाध्यक्ष अष्टलक्ष्मी शाक्यले पार्टीमा उमेरहद कायम राखेर नयाँ पुस्तालाई अगाडि ल्याउनुपर्ने बताएकी छन् । पछिल्ला दिनमा एमालेभित्र भण्डारीको पक्षमा नेताहरू खुलेर उभिन थालेको आन्तरिक स्रोतहरू बताउँछन् ।

    प्रतिक्रिया दिनुहोस्
    images
    images