काठमाडौं– उपेन्द्र यादव नेतृत्वको जनता समाजवादी पार्टी (जसपा) नेपालले सरकारलाई दिएको समर्थन फिर्ता लिनेबारे छलफल थालेको छ ।
पार्टीका सांसद प्रकाश अधिकारीका अनुसार कार्यकारिणी समितिले समर्थन पुनर्विचार गर्न संसदीय दललाई निर्देशन दिइसकेको छ ।
अब संसदीय दलको बैठक बोलाएर निर्णय लिने तयारी छ ।
यदि जसपाले समर्थन फिर्ता लिएमा राष्ट्रिय सभामा सरकारको बहुमत गुम्न सक्छ । हाल ५९ सदस्यीय सभामा कांग्रेस, एमाले, जसपा र लोकतान्त्रिक समाजवादीसहित सत्तापक्षसँग ३१ मत छ ।
तर, जसपाका तीन सांसदले समर्थन फिर्ता लिएमा सत्तापक्षको मत २८ मा झर्नेछ ।
माओवादी अध्यक्ष प्रचण्ड पक्षधर मनोनित सांसद नारायण दाहाल र तटस्थ देखिएका वामदेव गौतमको भूमिकाले पनि सत्तापक्षको स्थितिमा असर पार्न सक्छ ।
दाहाल राष्ट्रिय सभा अध्यक्ष भएकाले उनले बराबरी अवस्थामा मात्रै मतदान गर्न पाउँछन् ।
यसरी बहुमत गुमेपछि सरकारले राष्ट्रिय सभामा बजेटसहितका विधेयक पारित गराउन गाह्रो हुन सक्छ ।
बजेट १२ असारमा राष्ट्रिय सभामा टेबल हुँदैछ भने १७ गतेसम्म पारित गर्ने कार्यतालिका छ ।
यसअघि पनि जसपाको असहमतिका कारण भूमिसम्बन्धी विधेयक अगाडि बढाउन सरकारले सकिरहेको थिएन ।
समर्थन फिर्ता भएमा बजेटपछि अन्य विधेयकहरू पनि रोकिने सम्भावना बलियो छ ।























