विश्व खबर 
काठमाडौं : फिफा क्लब विश्वकपमा इटालियन क्लब युभेन्टसले संयुक्त अरब इमिरेट्स (यूएई)को क्लब अल ऐनलाई ५–० गोलले पराजित गरेको छ।
वाशिंगटन डीसीको अडी फिल्डमा समूह जी अन्तरगत आज बिहान भएको खेलमा युभेन्टसले फिफा क्लब विश्वकप यात्राको सुरुवात धमाकेदार रूपमा गरेको छ।
म्याकेनीको कप्तानीमा सिरी ए टोलीका लागि फ्रान्सेली खेलाडी रान्डल कोलो मुआनी र पोर्चुगिज विङ्गर फ्रान्सिस्को कोन्सेइकाओले दुई–दुई गोल गर्दै तीन अंक हासिल गरे। टर्कीका फरवार्ड केनान यिल्डिजले थप एक गोल गरे।
खेलको ११ औँ मिनेटमा कोलो मुआनीले गोल गर्दै अग्रता लिए भने त्यसको १० मिनेटपछि कोन्सेइकाओले गोल गर्दै अग्रता दोब्बर बनाए। पहिलो हाफको स्टपेज टाइमा, कोलोले अर्को गोल थपे। पहिलो हाफमा ४–० को अग्रता लिएको युभेन्टसका कोन्सेइकाओले व्यक्तिगत दोस्रो गोल ५८औं मिनेटमा गरे पछि युभेन्टसले पाँच शून्यको अग्रता बनायो।
अल ऐनले मैदानमा आफ्नो उपस्थिती गतिलो रुपमा देखाउन सकेन। पहिलो हाफमा खराब प्रदर्शन उसका लागि महङ्गो पर्यो। दोस्रो हाफमा भने अल ऐनले सुधारिएको खेल खेल्यो।
समूह जीमा रहेको युभेन्टस तालिकाको शीर्ष स्थानमा उक्लियो। यही समूहमा इङ्लिस क्लब म्यानचेस्टर सिटी पनि रहेको छ। उसले गएराति भएको खेलमा क्लब वायडाडलाई २–० ले हराएको थियो।
