विश्व खबर 
काठमाडौं– जेठ २५ मा अनेरास्ववियुको २४औँ महाधिवेशन उद्घाटनका क्रममा नेकपा (एमाले) अध्यक्ष केपी शर्मा ओलीले पार्टी विधानको ७० वर्षे उमेर सीमा हटाउनुपर्नेमा जोडदिए ।
७४ वर्षे ओली आफैंले विधानअनुसार उमेदवार बन्ने मापदण्ड नपुगेको स्वीकार गरे । अहिले एमालेको आगामी भदौमा हुने विधान महाधिवेशनलाई लक्षित गर्दै यो प्रावधान हटाउने प्रयास चलिरहेको छ ।
तर, वरिष्ठ उपाध्यक्ष ईश्वर पोखरेलसहित धेरै सचिवालय सदस्य भने उमेर सीमा कायम राख्नुपर्ने पक्षमा छन् । पोखरेलले सार्वजनिक रूपमा दुई कार्यकाल र ७० वर्षे हदको प्रावधानलाई निरन्तरता दिनुपर्ने बताउँदै आएका छन् । यसले ओलीको नेतृत्वलाई चुनौती दिन थालेको देखिन्छ ।
पूर्वराष्ट्रपति विद्यादेवी भण्डारीको सक्रियता र सम्भावित ‘कमब्याक’को तयारीले पनि ओलीको दबाब बढाएको छ । पार्टीको नेतृत्व परिवर्तनको चर्चा शिखरमा पुगेको छ । उपाध्यक्ष विष्णुप्रसाद पौडेल र महासचिव शंकर पोखरेल पनि भित्रभित्रै नेतृत्वका आकांक्षी देखिएका छन् ।
२०७८ सालमा ओलीकै लागि संशोधित गरिएको ७० वर्षेहदको व्यवस्था फेरि विवादमा तानिँदैछ । दुई वर्षअघि नेकपा (एकीकृत समाजवादी)बाट फर्किन चाहने नेताहरूलाई व्यवस्थापन गर्न यो प्रावधान अन्तरिम रूपमा हटाइएको थियो । अब महाधिवेशनले त्यसलाई अनुमोदन गर्ने वा खारेज गर्ने भन्ने अन्योल कायमै छ ।
पार्टीभित्र ओलीको छत्रता घट्दै गएको र पोखरेलको अडान संस्थापन धारमै बलियो बन्दै गएको सन्देश दिएका छन् । एमालेको नेतृत्व आगामी महाधिवेशनपछि कस्को हातमा जाने हो भन्ने प्रश्नले अहिले आन्तरिक राजनीति तातेको छ ।
प्रतिक्रिया दिनुहोस्