काठमाडौं– नेकपा (एकीकृत समाजवादी)का अध्यक्ष माधव नेपाल भ्रष्टाचार मुद्दामा सांसद पद निलम्बनमा परे पनि पार्टी अध्यक्ष पद नछोड्ने अडानमा छन् ।
अख्तियारले पतञ्जली जग्गा प्रकरणमा भ्रष्टाचार मुद्दा दायर गरेपछि जेठ २२ गते उनको सांसद पद स्वतः निलम्बनको छ । तर, अध्यक्ष पद छोड्न कानुनी बाध्यता नभएको भन्दै उनले जिम्मेवारी नत्याग्ने संकेत गरेका छन् ।
पार्टीभित्र भने नेपालले अध्यक्ष पद छोड्नुपर्ने र तत्काल संसदीय दलको नेता चयन गर्नुपर्ने मतहरू देखिएका छन् । यसले समाजवादी पार्टीभित्र दुई धारको संघर्ष देखिएको छ । एक पक्ष नेपालले नै अध्यक्ष रहनुपर्ने धारणा राख्छ भने अर्को पक्ष नेतृत्व परिवर्तन आवश्यक ठान्छ ।
पार्टीमा तीन खालका धार देखिएका छन् । एक– नेपाललाई नै अध्यक्ष राख्ने, दुई– राजेन्द्र पाण्डेलाई कार्यवाहक अध्यक्ष बनाउने र तीन– वरिष्ठ नेता झलनाथ खनाललाई नेतृत्व दिनुपर्ने ।
खनालले अघिल्लो महाधिवेशनमा नेपाललाई अध्यक्ष बनाउन सहयोग गरेका थिए भन्ने तर्क पनि त्यस समूहले गरेको छ । तर, नेपाल खनाललाई जिम्मेवारी दिने पक्षमा नरहेको स्रोतको दाबी छ ।
अहिले नेपाल संसदीय दलको नेता चयन नगरी उपनेता पाण्डेमार्फत काम अघि बढाउने सोचमा छन् । बजेट पारित भएपछि संसद् पनि लामो समय नचल्ने भएकाले दलको नेतृत्वको विषय केही समयलाई ओझेलमा राख्ने रणनीति देखिएको छ ।
स्रोतका अनुसार नेपाल अध्यक्ष रहँदै मुद्दा लड्दा सजिलो हुने र छिटो टुंग्याउन सकिने विश्वासमा पनि छन् । सचिवालयको बैठक असार पहिलो साता बस्ने तयारीमा छ । त्यसबेला यो विषयमा निर्णयको प्रयास हुने अपेक्षा गरिएको छ ।























