विश्व खबर 
काठमाडौं – झण्डै दुई महिनापछि आज बसेको मधेश प्रदेशसभाको बैठक प्रतिपक्षी दलको अवरोधले स्थगित भएको छ ।
प्रदेश सभाको पाँचौँ अधिवेशनको बैठक आज दिउँसो १ बजेका लागि डाकिएको थियो, तर बैठक ४ बजे सुरु भएको थियो । सभामुख रामचन्द्र मण्डलले कारबाही सुरु गरे लगत्तै प्रतिपक्षी दलले अवरोध गरेपछि बैठक नै स्थगित गरिएको छ ।
प्रमुख प्रतिपक्षी जसपा नेपालका सचेतक रामआशिष यादवले आर्थिक अनुशासनको खुलेयाम उल्लंघन भएको र सो विषयमा छानबिन समिति गठन गर्ने सहमति भए पनि नगरिएकाले बैठक चल्न नदिने बताए ।
उनले भने, ‘संसदीय छानबिन समिति गठन भएको आज एक महिना २४ दिन बित्यो । प्रतिपक्षी दलले नामसमेत दिइसकेको छ, तर सत्तापक्षले नाम अझै दिएको छैन । सरकार नै चाहन्छ भ्रष्टाचार होस् ।’
छानबिन समिति गठन नभएसम्म प्रतिपक्षी दलले सदन अवरुद्ध पार्ने उनको भनाइ छ ।
सभामुख मण्डलले तीन घण्टा लगाएर छलफल गरे पनि सहमति नजुटेको भन्दै बैठक स्थगित गरिएको जानकारी गराए । उनका अनुसार अर्को बैठक भोलि दिउँसो १ बजे बस्नेछ ।
