विश्व खबर 
काठमाडौं- सेयर कारोबार साताको अन्तिम दिन आज नेप्से परिसूचक सामान्य अंकले बढेको छ।
दिनभर जसो थपघट भइरहेको बजार अन्तिममा ५ अंकले बढेर २०४२.०७ विन्दुमा रोकिएको छ ।
यसदिन नेप्से सामान्य अंकले बढे पनि कारोबार रकम बु्धबारको तुलनामा घटेको छ। यसदिन २७० कम्पनीको ७८ लाख ९६ हजार ४७८ कित्ता सेयर ३ अर्ब १६ करोड २८ लाख १० हजार ८४३ रुपैयाँमा खरिदबिक्री भयो।
अघिल्लो कारोबार दिन बुधबार ५ अर्ब १ करोड ७८ लाख ७ हजार ६८२ रुपैयाँको सेयर कारोबार भएको थियो। सो दिन नेप्से परिसूचक १६.४२ अंकले बढेको थियो।
आज दुईवटा कम्पनीको सेयर मूल्य १० प्रतिशत हाराहारीमा बढेको हो। सिटी होटलको ९.९७ र अभियान लघुवित्त वित्तीय संस्थाको सेयर मूल्य ९.२० प्रतिशतले
बढेको हो।
कारोबार रकमका आधारमा शिवम् सिमेन्ट शीर्षस्थानमा रह्यो। सो कम्पनीको १७ करोड मूल्य बराबरको कारोबार भयो। सोल्टी होटलको १६ करोड र नेपाल लाइफ इन्स्योरेन्सको १४ करोड मूल्य बराबरको सेयर कारोबार भयो।
कारोबारमा आएका १३ उपसमूहमध्ये ७ को मूल्य घट्यो भने ६ को बढ्यो। होटल्स एन्ड टुरिजम इन्डेक्सको सूचक सर्वाधिक ४.५६ प्रतिशतले बढ्यो।
आज ७५ कम्पनीको मूल्य बढ्दा १३९ को घट्यो भने बाँकी ९ को स्थिर रह्यो।
