नयाँ लेबल लगाएर दाल बेच्ने उद्योगीको गोदाम सिल

१२ फागुन, विराटनगर । पाँच वर्षअघि म्याद सकिएको रहरको दालमा नयाँ लेबर राखेर बिक्री गरेको पाइएपछि विराटनगरका एक उद्योगीको गोदाम सिल गरिएको छ ।
वाणिज्य कार्यालय विराटनगरको अनुगमन टोलीले लेबल परिवर्तन गरी भण्डारण र बिक्री गरेको पाइएपछि ३९ हजार ६ सय किलो दालसहित उद्योगी अभिनाश बोहराको घरमा रहेको गोदाम सिल गरेको छ ।

वाणिज्य कार्यालयको नेतृत्वमा निस्किएको अनुगमन टोलीले नक्कली लेबल लगाएर बिक्रीका लागि पठाएको भेटेपछि बोहराको गोदाममा छापा मारेको थियो । सन् २०१३ मा प्याकेजिङ गरिएको दालको बोरामा नयाँ लेबलरहितको स्टिकर टाँस गरेको पाइएपछि गोदाम सिल गरी सप्लायर्सलाई तत्काल तीन लाख रुपैयाँ जरिवाना गरेको वाणिज्य कार्यालय विराटनगरका निमित्त प्रमुख सन्तोष पोखरेलले जानकारी दिए ।

प्रतिक्रिया दिनुहोस्