काठमाडौं– इरानको इस्लामिक रिभोलुसनरी गार्ड कर्प्स (आईआरजीसी) ले बहराइनस्थित इसा एयरबेसमा रहेको अमेरिकी राडार प्रणालीलाई निशाना बनाएर गरेको हवाई आक्रमण विफल पारेको बहराइनले दाबी गरेको छ ।
बहराइनको सेनाले इरानबाट भएका हवाई आक्रमणलाई आफ्नो हवाई प्रतिरक्षा प्रणालीमार्फत निस्तेज पारेको दाबी गरेको हो ।
सामाजिक सञ्जाल एक्समार्फत सार्वजनिक गरेको वक्तव्यमा बहराइन डिफेन्स फोर्सले आफ्नो हवाई प्रतिरक्षा प्रणाली उच्च सैन्य सतर्कता र दृढताका साथ परिचालित भएको र इरानले राखेको उद्देश्य पूरा हुन नदिएको जनाएको छ ।
पछिल्लो पाँच दिनमा इरानले बहराइनमाथि तीन पटक ड्रोन आक्रमण गरेको छ ।
इरानी हवाई क्षेत्रमा अमेरिकाले निरन्तर उल्लंघन गरेको भन्दै त्यसको जवाफस्वरूप आक्रमण गरिएको आईआरजीसीले बताउँदै आएको छ ।
शुक्रबारयता अमेरिका र इरानबीचको सैन्य द्वन्द्वमा आक्रमण तथा प्रतिकारका नियम परिवर्तन हुँदै गएको छ । यसअघि इरानले आफ्नो समन्वयविना स्ट्रेट अफ होर्मुज हुँदै तेल बोकेका जहाजलाई अमेरिकाले सुरक्षा दिएर अघि बढाए अमेरिकी सैन्य अखडामाथि आक्रमण गर्ने चेतावनी दिएको थियो ।
अहिले भने इरानले बहराइनस्थित अमेरिकी राडार प्रणालीमाथिको आक्रमणलाई आफ्नो हवाई क्षेत्रमा अमेरिकाले निरन्तर गर्दै आएको उल्लंघनको प्रतिक्रियाका रूपमा व्याख्या गरेको छ । यसबाट इरानले अमेरिकासँग आफ्नो प्रतिरोध क्षमता पुनः स्थापित गर्न खोजिरहेको देखिन्छ ।
-फाइल तस्विर






















