विश्व खबर 
काठमाडौं- पाकिस्तानी अन्तरिक्ष यात्री चीनको अन्तरिक्ष स्टेशन मिशनमा जाने भएका छन् । उनी चीनको अर्को कक्ष मिशनमा सामेल हुनेछन् ।
पाकिस्तान र चीन नजिकका कूटनीतिक तथा रणनीतिक साझेदार हुन् । सन् २०२५ को फेब्रुअरीमा दुवै देशले पाकिस्तानी अन्तरिक्ष यात्रीहरूका लागि चिनियाँ सरकारको तालिम कार्यक्रम सुरु गर्ने सम्झौता गरेका थिए ।
चीनको अन्तरिक्ष निकाय (सीएमएसए) ले सामाजिक सञ्जालमा जनाएअनुसार पाकिस्तानी अन्तरिक्ष यात्री शेनझोउ–२४ दलका साथ उडान गर्नेछन् । भनाइमा प्रस्थानको मिति उल्लेख गरिएको छैन । तर यो मिशन यस वर्षको अन्त्यसम्ममा हुने अपेक्षा गरिएको छ ।
सीएमएसएका अनुसार पाकिस्तानी अन्तरिक्ष यात्री (पेलोड विशेषज्ञ) छोटो कक्ष उडानमा सामेल हुनेछन् र मे महिनामा तियाङ्गोङ अन्तरिक्ष स्टेशनमा डक भएको शेनझोउ–२३ अन्तरिक्ष यानसँगै फर्कनेछन् ।
सीएमएसएले पाकिस्तानी दल सदस्यको नाम खुलाएको छैन। तर अप्रिलमा मुहम्मद जीशान अली र खुर्रम दाउद नामका अन्तरिक्ष यात्रीहरूलाई चीनमा तालिम सुरु गर्न छानिएको बताएको थियो ।
बेइजिङले हालका वर्षहरूमा आफ्नो अन्तरिक्ष कार्यक्रममा ठूलो लगानी गरेको छ । यसले मुख्य प्रतिद्वन्द्वी संयुक्त राज्य अमेरिकाको बराबरी गर्दै सन् २०३० सम्म चन्द्रमामा अन्तरिक्ष यात्री उतार्ने लक्ष्य राखेको छ ।
पाकिस्तान यसका लागि स्वाभाविक साझेदार हो । दुवै देश आफ्नो दशकौं पुरानो ‘सबै समय’ मित्रताको प्रायः चर्चा गर्छन् । चीन पाकिस्तानको सबैभन्दा ठूलो व्यापारिक साझेदार र प्रमुख विदेशी लगानीकर्ता हो ।
सिन्ह्वा न्यूज एजेन्सीले दाबी पुष्टि गर्दै भनेको छ, “सन् २०२५ को सम्झौताअनुसार चीनमा तालिमपछि पाकिस्तानी अन्तरिक्ष यात्रीहरूले ‘आउँदा केही वर्ष’ चिनियाँ सहकर्मीहरूसँग छोटो अवधिका अभियानमा सामेल हुनेछन् ।”
