विश्व खबर 
काठमाडौं– जापानका लागि प्रस्तावित राजदूत जिज्ञानकुमार थापाले जापानको पीआर फिर्ता गरेको प्रमाण पेश गर्न नसकेपछि आफ्नो नाम फिर्ता लिएका छन् । सोमबार बसेको संसदीय समितिको बैठकमा उनले लिखित रुपमा आफ्नो नाम फिर्ता लिएको सिंहदरबारमा बसेको बैठकमा संसदीय सुनुवाइ समितिका सभापति बोधनारायण श्रेष्ठले जानकारी दिएका हुन् ।
प्रस्तावित राजदूत थापाले आफूले नाम फिर्ता लिएको पत्र संसदीय सुनुवाइ समितिमा पठाएका थिए । उक्त पत्र समितिका सभापति श्रेष्ठले पढेर सुनाएका थिए । पत्रमा थापाले ‘कन्फ्लिक्ट अफ इन्ट्रेस्ट’ हुन गएकाले आफूले नाम फिर्ता लिएको उल्लेख गरेका छन् ।
जसमा असोज २८ गते दुई देशका लागि प्रस्तावित राजदूतको नाम अस्वीकृत हुँदा थापालाई होल्डमा राखिएको थियो । थापाले जापानको पीआर फिर्ता गरेको प्रमाण पेश गर्न नसकेसँगै राजदूतबाट फिर्ता हुनु परेको हो ।
यसअघि संसदीय सुनुवाइ समितिले सरकारले राजदूत नियुक्तिका लागि सिफारिस गरेका दुई जनाको नाम अस्वीकृत गरेको थियो । समितिले साउदी अरबका लागि प्रस्तावित गिरीबहादुर सुनार र मलेसियाका लागि प्रस्तावित चूडामणि खरेलको नाम अस्वीकृत गरेको हो ।
सुनुवाइका क्रममा प्रस्तावित उम्मेदवारहरूमाथि परेका उजुरी र उनीहरूको आचरणसम्बन्धी प्रश्न उठेका थिए । सुनारमाथि महिला हिंसा, धम्की तथा आर्थिक लेनदेनसम्बन्धी आरोप लगाइएको थियो । खरेलमाथि पनि स्वार्थको द्वन्द्व र अनुदान मिलाइदिने भन्दै रकम लिएको लगायतका आरोपसहित उजुरी परेका थिए ।
सुनुवाइका क्रममा सांसदहरूले उजुरीमा उल्लेख गरिएका विषयमा उम्मेदवारहरूसँग जवाफ मागेका थिए । खरेलले उठेका प्रश्नमा चित्तबुझ्दो जवाफ दिन नसकेको समितिको निष्कर्ष थियो । सुनारले महिला हिंसासम्बन्धी उजुरी परेकी महिलासँग प्रेम सम्बन्ध रहेको स्वीकार गरेका थिए ।
जापानका लागि प्रस्तावित थापामाथि जापानको स्थायी आवासीय अनुमति (पीआर) लिएको र त्यहाँको सरकारी सेवामा काम गरेको विषयमा उजुरी परेको थियो । समितिले यस विषयमा थप कागजात अध्ययन गरेपछि निर्णय गर्ने भन्दै आवश्यक कागज पत्र माग गरेको थियो ।
