विश्व खबर 
काठमाडौं– अमेरिकी विदेशमन्त्री मार्को रुबियोले ब्राजिलको राष्ट्रपति निर्वाचनमा पराजित उम्मेदवार फ्लाभियो बोल्सोनारोलाई ब्राजिलबाट अमेरिका भाग्न राष्ट्रपति डोनाल्ड ट्रम्प प्रशासनले कुनै सहयोग नगरेको बताएका छन् ।
ब्राजिलका राष्ट्रपति लुइज इनासियो लुला दा सिल्भासँगको दोस्रो चरणको निर्वाचनमा पराजित भएपछि बोल्सोनारो अर्जेन्टिनाबाट इक्वेडर हुँदै अमेरिका भागेका थिए । अमेरिकी विदेश मन्त्रालयले अक्टोबर २५ मा भएको निर्वाचनमा उनको पराजयपछि बोल्सोनारो र उनको परिवारलाई अमेरिकी भिसा दिने घोषणा गरेको एक दिनपछि उनी बुधबार फ्लोरिडाको मियामी पुगेका थिए ।
बोल्सोनारोमाथि ब्राजिलमा भ्रष्टाचार, सम्पत्ति शुद्धीकरण र कर छलीको आरोपमा अनुसन्धान भइरहेको छ । देश छाड्न सक्ने जोखिम रहेको भन्दै प्रहरीले उनको राहदानी बुझाउनसमेत आदेश दिएको थियो ।
शनिबार जर्जियाको एटलान्टामा आयोजित पत्रकार सम्मेलनमा रुबियोले बोल्सोनारोलाई अमेरिका आउन आफूहरूले कुनै सहजीकरण नगरेको स्पष्टीकरण दिए ।
‘हामीले कुनै पनि कुरामा सहजीकरण गरेका थिएनौं’, रुबियोले पत्रकारहरूसँग भने, ‘उनी अमेरिका आइपुगेको जानकारी हामीले पाएका थियौं । उनीसँग यसअघि नै अमेरिकी भिसा थियो र राष्ट्रपतिले उनलाई देश प्रवेश गर्न दिने निर्णय गर्नुभयो ।’
उनले बोल्सोनारो ब्राजिलबाट अमेरिका पुग्ने क्रममा भएका कुनै पनि गतिविधिमा अमेरिकी सरकार प्रत्यक्ष रूपमा संलग्न नरहेको जिकिर गरे ।
रुबियोले शुक्रबार र शनिबार एटलान्टामा ब्राजिलका विदेशमन्त्री माउरो भिएरासँग भेट भएको जानकारी दिँदै नोभेम्बरमा फ्रान्समा हुने विदेशमन्त्रीहरूको बैठकमा पनि ब्राजिलका अधिकारीहरूसँग पुनः भेट हुने अपेक्षा गरेको बताए ।
यसैबीच अमेरिकी राष्ट्रपति डोनाल्ड ट्रम्पले बोल्सोनारोप्रति सहानुभूति व्यक्त गरेका छन् । यसअघि ब्राजिलको निर्वाचनलाई ‘धाँधलीपूर्ण’ भन्दै आएका ट्रम्पले बोल्सोनारो अमेरिकामा आफूले चाहेसम्म बस्न सक्ने बताएका छन् ।
शनिबार फ्लोरिडास्थित आफ्नो निवासमा पत्रकारहरूसँग कुरा गर्दै ट्रम्पले भने, ‘मलाई लाग्छ, उनीमाथि निकै खराब व्यवहार गरियो । त्यसैले उनी यहाँ आफूले चाहेसम्म बस्न सक्छन् ।’
रोयटर्स समाचार संस्थाका अनुसार बोल्सोनारोलाई अमेरिकाले ‘ह्युम्यानिटेरियन प्यारोल’ अर्थात् मानवीय आधारमा अस्थायी प्रवेश अनुमति दिएको हो । यस्तो अनुमति सामान्यतया एक वर्षसम्मका लागि हुने गर्छ ।
ट्रम्पको पछिल्लो अभिव्यक्तिले पश्चिमी गोलाद्र्धका दुई ठूला लोकतान्त्रिक मुलुक अमेरिका र ब्राजिलबीचको सम्बन्ध अझै केही समय तनावपूर्ण रहन सक्ने संकेत गरेको छ ।
निर्वाचनमा पराजित भएपछि बोल्सोनारो अर्जेन्टिना र इक्वेडर हुँदै अमेरिका पुगेका थिए । अमेरिकी सञ्चारमाध्यमका केही समाचारमा उनको अमेरिका पलायनको यात्राको व्यवस्था गर्न ह्वाइट हाउसका अधिकारी जेसन मिलरले आंशिक सहयोग गरेको उल्लेख गरिएको थियो ।
बोल्सोनारोले भने ब्राजिलको निर्वाचन परिणाम स्वीकार गरेका छैनन् । उनले कुनै प्रमाण प्रस्तुत नगरी निर्वाचनमा धाँधली भएको दाबी गर्दै आएका छन् ।
अमेरिका पुगेपछि पनि उनले आफूलाई ब्राजिलको वास्तविक ‘नेता’ का रूपमा प्रस्तुत गरेका थिए । आफू राजनीतिक प्रतिशोध र उत्पीडनको सिकार भएको दाबी गर्दै देश छाड्नुपरेको उनको भनाइ छ ।
बोल्सोनारो अमेरिका पुगेको विषयलाई लिएर ब्राजिलले अर्जेन्टिनाका कूटनीतिक प्रतिनिधिलाई समेत बोलाएर स्पष्टीकरण मागेको छ ।
