विश्व खबर 
काठमाडौं– मधेश प्रदेशमा नयाँ सरकार गठनका लागि नेकपा (एमाले) र जनता समाजवादी पार्टी (जसपा) नेपालबीच छलफल भएको छ ।
एमाले अध्यक्ष केपी शर्मा ओली र जसपा नेपालका अध्यक्ष उपेन्द्र यादवसहितका नेताहरूबीच यस विषयमा छलफल भएको हो ।
जसपा नेपालका संसदीय दलका नेता सरोज कुमार यादवको नेतृत्वमा नयाँ सरकार गठन गर्ने गरी गठबन्धन बनाउने प्रयास भइरहेको एक नेताले बताएका छन् ।
एमालेले नेपाली कांग्रेस नेतृत्वको मधेश प्रदेश सरकारबाट समर्थन फिर्ता लिएपछि नयाँ राजनीतिक समीकरणको प्रयास सुरु भएको हो ।
यद्यपि, जसपा नेपालका अध्यक्ष उपेन्द्र यादवले एमालेसँग सहकार्य गरेर सरकारमा सहभागी हुने विषयमा कुनै निर्णय वा समझदारी नभएको स्पष्ट पारेका छन् ।
तत्काल एमालेसँग सहकार्यको सम्भावना नरहेको उनको भनाइ छ ।
यद्यपि गुन्डू बस्ने ओली र हात्तीवन बस्ने यादवबीच पटकपटक भेटवार्ता भएको बताइएको छ ।
१०७ सदस्यीय मधेश प्रदेश सभामा जसपा नेपालका २७, एमालेका २३, कांग्रेसका २२ र नेपाली कम्युनिस्ट पार्टीका १५ सांसद छन् ।
प्रदेश सभामा सरकार गठनका लागि कम्तीमा ५४ सांसदको समर्थन आवश्यक पर्छ ।
