विश्व खबर 
काठमाडौं– सत्तारूढ राष्ट्रिय स्वतन्त्र पार्टी (रास्वपा)का सांसद खगेन्द्र सुनार जोडिएको भनिएको महिला हिंसासम्बन्धी अडिओ प्रकरणको अनुसन्धान दोस्रो चरणमा प्रवेश गरेको छ ।
अडिओमा सुनिएको स्वर आफ्नो नभएको सुनारले दाबी गरेपछि पार्टीको केन्द्रीय अनुशासन आयोगले छुट्टै छानबिन समिति गठन गरेको छ ।
बिहीबार बसेको आयोगको बैठकले उपप्रमुख हरिचन्द्र भट्टराईको संयोजकत्वमा समिति गठन गरेको हो ।
समितिले अडिओ–भिडिओको प्राविधिक परीक्षण गर्नुका साथै आवश्यक प्रमाण संकलन गर्नेछ ।
आयोगले अडिओ सार्वजनिक गरेको जनआस्था र पीडित भनिएकी महिलाको अन्तर्वार्ता प्रसारण गर्ने न्युज २४ लाई पत्राचार गरी सम्बन्धित सामग्री माग्ने जनाएको छ ।
आवश्यक परे प्राविधिक विज्ञको सहयोगसमेत लिइनेछ ।
अडिओमा महिलालाई अश्लील शब्द प्रयोग गर्दै गाली गरेको र पैसा नदिए ज्यान मार्ने धम्की दिएको भनिएपछि सुनार विवादमा तानिएका हुन् ।
उनले उक्त अडिओ आफ्नो नभएको र एआई तथा क्यारिकेचर प्रविधिबाट तयार पारिएको दाबी गरेका छन् ।
पीडित भनिएकी महिलाले पनि अडिओमा बोल्ने व्यक्ति आफू नभएको बताएकी छन् ।
छानबिन समितिले प्रमाणसहितको प्रतिवेदन आयोगलाई बुझाउनेछ ।
दसैंअघि प्रारम्भिक पत्राचार गरिने र बाँकी अनुसन्धान दसैँपछि अघि बढाइने आयोगले जनाएको छ ।
