विश्व खबर 
काठमाडौं – सन् २०२६ को सेप्टेम्बर महिनामा नेपालमा विदेशी पर्यटकको आगमन बढेको छ । नेपाल पर्यटन बोर्डका अनुसार उक्त महिनामा ८८ हजार २४८ विदेशी पर्यटक नेपाल भित्रिएका छन् । गत वर्षको सोही महिनामा ७८ हजार ७११ पर्यटक नेपाल आएका थिए ।
गत वर्षको तुलनामा यस वर्ष सेप्टेम्बरमा ९ हजार ५३७ जना बढी विदेशी पर्यटक नेपाल आएका हुन् । पर्यटक आगमन बढे पनि भदौ १० गते रसुवाको भोटेकोशी नदीमा आएको बाढीका कारण अपेक्षित संख्यामा पर्यटक भित्रिन नसकेको पर्यटन बोर्डले जनाएको छ ।
नेपाल आउने पर्यटकमध्ये दक्षिण एसियाली मुलुकबाट आउनेको संख्या सबैभन्दा धेरै रहेको छ । सेप्टेम्बरमा दक्षिण एसियाबाट मात्रै ३० हजार ८५ पर्यटक नेपाल आएका छन् ।
दक्षिण एसियाबाट नेपाल आउनेमा भारतीय पर्यटकको संख्या सबैभन्दा धेरै छ । बोर्डका अनुसार सेप्टेम्बरमा १७ हजार ४२५ भारतीय पर्यटक नेपाल आएका छन् । त्यस्तै श्रीलङ्काबाट सात हजार १०८, बङ्गलादेशबाट तीन हजार ९६४, भुटानबाट एक हजार १११, पाकिस्तानबाट ४२९, माल्दिभ्सबाट ४८ र अफगानिस्तानबाट आठ पर्यटक नेपाल आएका छन् ।
दक्षिण एसियाबाहेक अन्य एसियाली मुलुकबाट १९ हजार ८८८ पर्यटक नेपाल भित्रिएका छन् । तीमध्ये चीनबाट ११ हजार २१२, जापानबाट दुई हजार ६६, दक्षिण कोरियाबाट एक हजार ४१२, थाइल्यान्डबाट ६०१ र भियतनामबाट ६३७ पर्यटक आएका छन् ।
त्यस्तै युरोपेली मुलुकबाट १५ हजार १४८, ओसियाना क्षेत्रबाट पाँच हजार ४२२, अमेरिकी मुलुकबाट १० हजार १०७, मध्यपूर्वबाट दुई हजार ६०६ र अफ्रिकी मुलुकबाट चार हजार ५६८ पर्यटक नेपाल आएका छन् ।
पर्यटन बोर्डका अनुसार समग्र पर्यटक आगमनमा वृद्धि देखिए पनि रसुवाको भोटेकोशीमा आएको बाढीले पर्यटकीय आवागमनमा असर पारेको छ । बाढीका कारण सडक तथा पर्यटकीय पूर्वाधारमा परेको प्रभावले केही समय पर्यटकको आवागमन प्रभावित भएको बोर्डको भनाइ छ ।
गत वर्ष सेप्टेम्बरमा ७८ हजार ७११ विदेशी पर्यटक नेपाल आएकोमा यस वर्ष सोही अवधिमा ८८ हजार २४८ पुगेको तथ्याङ्कले पर्यटन क्षेत्रमा सुधारको संकेत देखाएको छ । विशेषगरी भारतसहित दक्षिण एसियाली मुलुकबाट हुने पर्यटक आगमनले नेपालको समग्र पर्यटक आगमन बढाउन योगदान गरेको देखिएको छ ।
