विश्व खबर 
काठमाडौं- गैरआवासीय नेपाली संघ (एनआरएनए) का पूर्वअध्यक्ष तथा व्यवसायी डा. शेष घले र उनकी पत्नी जमुना गुरुङको एमआईटी ग्रुप फाउन्डेसनले भोटेकोसी बाढीबाट प्रभावित तथा अभिभावकविहीन बनेका बालबालिकाका लागि ५७ करोड ८५ लाख रुपैयाँ सहयोग गर्ने भएको छ ।
फाउन्डेसनले राष्ट्रिय बाल अधिकार परिषद्सँग सम्झौता गर्दै बाढी प्रभावित १८ वर्षमुनिका योग्य बालबालिकालाई कक्षा १२ सम्म अध्ययनका लागि सहयोग गर्ने जनाएको छ ।
सहयोगबाट बालबालिकाको शिक्षा, खाना, आवास, लत्ताकपडा, स्वास्थ्यलगायत आधारभूत आवश्यकता पूरा गर्न मद्दत पुग्ने घलेले बताएका छन् ।
उनले बाढीको पानी घट्दैमा समस्या अन्त्य नहुने भन्दै प्रभावित बालबालिकालाई आगामी वर्षहरूमा समेत सहयोग जारी राख्ने प्रतिबद्धता जनाएका छन् ।
प्रतिक्रिया दिनुहोस्
