विश्व खबर 
काठमाडौं– नेपाल एसीसी प्रिमियर कपको सेमिफाइनलमा प्रवेश गरेको छ ।
आइतबार साउदी अरेबियालाई ५ विकेटले पराजित गर्दै नेपालले एक खेल अगावै अन्तिम चारमा स्थान पक्का गरेको हो ।
साउदीले दिएको १९१ रनको लक्ष्य नेपालले ४१ ओभरमा ५ विकेट गुमाएर पूरा गर्यो ।
नेपालका लागि गुल्शन झाले अविजित ४४ र कप्तान रोहित पौडेलले अविजित २४ रन बनाए ।
इशान पान्डेले ४०, देव खनालले ३९, आसिफ शेखले २० र अर्जुन कुमालले १५ रन जोडे ।
यसअघि टस जितेर ब्याटिङ गरेको साउदी अरेबिया ४९।२ ओभरमा १९० रनमा अलआउट भएको थियो ।
अब्दुल वाहीदले सर्वाधिक ७७ रन बनाउँदा मोहम्मद आतिफले ३० रन जोडे ।
नेपालका लागि सन्दीप लामिछानेले १० ओभरमा १९ रन खर्चेर ३ विकेट लिए ।
ललित राजवंशीले २ तथा दीपेन्द्रसिंह ऐरीले ३ विकेट लिए ।
नेपालले यसअघि बहराइन र मलेसियालाई पराजित गरेको थियो ।
समूह चरणको अन्तिम खेलमा नेपालले मंगलबार हङकङसँग खेल्नेछ ।
उक्त खेलपछि समूह विजेताको टुंगो लाग्नेछ ।
