विश्व खबर 
काठमाडौं– ‘नाइमा नेपाल मोबिलिटी एक्स्पो–२०२६’ लाई लक्षित गर्दै विभिन्न बैंक तथा बिमा कम्पनीहरूले सवारीसाधन कर्जामा विशेष ब्याजदर र सहुलियतपूर्ण योजना सार्वजनिक गरेका छन् । ग्लोबल आईएमई बैंक, एनएमबी बैंक, सिद्धार्थ बैंक र मुक्तिनाथ विकास बैंकले अटो कर्जामा आकर्षक ब्याजदर, शुल्क छुट र छिटो कर्जा स्वीकृतिसहितका योजना ल्याएका हुन् ।
बैंकहरूले आधार दरमा कम प्रिमियम जोडेर कर्जा उपलब्ध गराउने, कर्जा प्रक्रियामा सहजीकरण गर्ने र विभिन्न सेवा शुल्कमा छुट दिने व्यवस्था गरेका छन् ।
एनएमबी बैंकले नयाँ विद्युतीय सवारीसाधन बुक गर्ने ग्राहकलाई लक्षित गर्दै आधार दरमा ०.५ प्रतिशत मात्र थपेर कर्जा दिने योजना ल्याएको छ । बैंककी रिलेसन म्यानेजर क्रचा पाण्डेका अनुसार सेकेन्डह्यान्ड गाडीको मूल्यांकन गरी त्यसको अधिकतम ५५ प्रतिशतसम्म कर्जा उपलब्ध गराइनेछ भने कर्जाको अधिकतम सीमा ३५ लाख रुपैयाँ हुनेछ ।
ग्लोबल आईएमई बैंकले ५.२५ प्रतिशतदेखि प्रिमियम सुरु हुने विशेष योजना ल्याएको छ । बैंकले सामान्य अवस्थामा आधार ब्याजदरमा १ देखि ३ प्रतिशतसम्म प्रिमियम जोड्ने भए पनि एक्स्पोलाई लक्षित गर्दै ०.५ प्रतिशतदेखि प्रिमियम सुरु हुने अफर सार्वजनिक गरेको हो ।
बैंकका प्रतिनिधि मञ्जिल श्रेष्ठका अनुसार ग्राहकका सबै कागजात र प्रक्रिया पूरा भएको अवस्थामा एक्स्पोस्थलमै तत्काल कर्जा उपलब्ध गराउन सकिने ‘नाइमा फेस्टिभ’ योजना अघि सारिएको छ ।
ग्लोबल आईएमई बैंकले नयाँ ईभी खरिद गर्ने ग्राहकका लागि तीन वर्षसम्म ५.९९ प्रतिशत स्थिर ब्याजदरको विशेष योजना पनि ल्याएको छ । तीन वर्षपछि बैंकको आधार दरमा अधिकतम २ प्रतिशत प्रिमियम थप गरी ब्याजदर कायम हुनेछ । बैंकले अटो कर्जा अधिकतम सात वर्षसम्मका लागि उपलब्ध गराउने जनाएको छ ।
तीन वर्ष पुरानो गाडीका लागि बाँकी चार वर्षसम्म कर्जा दिन सकिने व्यवस्था गरिएको छ । अन्य बैंकबाट कर्जा लिइरहेको गाडी पुनः फाइनान्स गर्न चाहने ग्राहकका लागि पनि सम्बन्धित बैंकमा बाँकी रहेको रकमलाई आधार मानेर कर्जा सुविधा उपलब्ध गराइने श्रेष्ठले बताए । व्यक्तिगत ग्राहकका लागि गाडीको बजार मूल्यको ६० प्रतिशतसम्म फाइनान्स गर्न सकिने उनको भनाइ छ ।
सिद्धार्थ बैंकले ०.५ प्रतिशत प्रोसेसिङ शुल्क र वार्षिक १ प्रतिशत प्रिमियमसहितको योजना ल्याएको छ । बैंकले नयाँ गाडी खरिदका लागि ५.५ प्रतिशत आकर्षक ब्याजदरमा कर्जा उपलब्ध गराउने जनाएको छ ।
नेपाल राष्ट्र बैंकको व्यवस्थाअनुसार बैंक तथा वित्तीय संस्थाले आफ्नो आधार दरमा अधिकतम ३ प्रतिशतसम्म प्रिमियम थपेर अटो कर्जाको ब्याजदर निर्धारण गर्न सक्छन् । पछिल्लो समय बैंकहरूको आधार दर घट्दै गएसँगै अटो कर्जाको ब्याजदर पनि क्रमशः घटिरहेको छ ।
नाइमा नेपाल मोबिलिटी एक्स्पो–२०२६ मा विशेष गरी विद्युतीय सवारीसाधनप्रति बढ्दो आकर्षणलाई लक्षित गर्दै बैंकहरूले प्रतिस्पर्धात्मक ब्याजदर र छिटो कर्जा स्वीकृतिका योजना ल्याएका हुन् । यसले एक्स्पोमा सवारी खरिद गर्ने ग्राहकलाई थप सहजता प्रदान गर्ने अपेक्षा गरिएको छ ।
