विश्व खबर 
काठमाडौं– नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले हेटौँडा कपडा उद्योग पुनः सञ्चालनमा ल्याउने सरकारको तयारीप्रति स्वागत गर्दै धन्यवाद दिएका छन् ।
सामाजिक सञ्जालमार्फत प्रतिक्रिया जनाउँदै प्रचण्डले नेपाल सरकारले हेटौँडा कपडा उद्योग पुनः सञ्चालनमा ल्याउने तयारी गरेको सुन्दा खुसी लागेको बताएका छन् । उनले यस पहलबाट कपडा उपभोगमा रहेको आयात निर्भरता घट्नुका साथै राष्ट्रिय अर्थतन्त्रलाई महत्वपूर्ण योगदान पुग्ने विश्वास व्यक्त गरेका छन् ।
आफू नेतृत्वको सरकारले हेटौँडा कपडा उद्योगको सम्भाव्यता अध्ययन तथा प्रतिवेदन तयार गराएको स्मरण गर्दै उनले त्यसकै आधारमा आर्थिक वर्ष २०८१/८२ को नीति तथा कार्यक्रममा हेटौँडा कपडा उद्योग, गोरखकाली रबर उद्योग, विराटनगर जुट मिल र बुटवल धागो कारखाना पुनः सञ्चालन गर्ने विषय अघि बढाइएको उल्लेख गरेका छन् ।
सघन गृहकार्यपछि अघि बढाइएको प्रक्रिया सरकारबाट बाहिरिएसँगै रोकिएको र अहिले पुनः अघि बढ्नु सुखद भएको भन्दै उनले सरकारलाई धन्यवाद दिएका हुन् ।
प्रचण्डले हेटौँडा कपडा उद्योगसँगै सम्भावना भएका अन्य सार्वजनिक उद्योगहरूलाई आधुनिक प्रविधि, व्यावसायिक व्यवस्थापन र स्पष्ट कार्ययोजनासहित पुनः सञ्चालन गर्न सके आत्मनिर्भर अर्थतन्त्र निर्माणतर्फ नेपालले ठूलो फड्को मार्न सक्ने धारणा राखेका छन् । उनले उत्पादन बढाउने, आयात घटाउने र रोजगारी सिर्जना गर्ने दिशामा यस्ता उद्योगको पुनरुत्थान महत्वपूर्ण हुने बताएका छन् ।
यसअघि गत शुक्रबार प्रधानमन्त्री बालेन शाहले सामाजिक सञ्जालमार्फत बन्द अवस्थामा रहेको हेटौँडा कपडा उद्योग पुनः सञ्चालन गर्न परीक्षण उत्पादन सुरु भइसकेको जानकारी दिएका थिए । उनका अनुसार केही मात्रामा कपडा उत्पादन पनि सुरु भएको छ । उत्पादनको जिम्मेवारी नेपाली सेनालाई दिइएको र परीक्षणपछि नेपाल सरकारले नै उद्योग सञ्चालन गर्ने तयारी गरिएको छ ।
प्रधानमन्त्री शाहले वर्षौँदेखि बन्द, घाटामा रहेका र निराशाले घेरिएका राष्ट्रिय उद्योगहरू पुनः आफ्नै खुट्टामा उभिने विश्वास व्यक्त गरेका छन् । नयाँ सरकारले राष्ट्रिय उद्योग र संस्थानलाई पुनर्जीवित र प्रतिस्पर्धी बनाउन सहजीकरण, उत्प्रेरणा र समन्वयलाई प्राथमिकता दिएको उनले बताएका छन् ।
प्रधानमन्त्रीले डीडीसीमा किसानको बक्यौता भुक्तानी घटाइएको, नेपाल औषधि लिमिटेडले नाफा आर्जन गरेको, नेपाल वायुसेवा निगमको आम्दानी र सिट उपयोगिता बढेको तथा सिंहदरबार वैद्यखानाको उत्पादन र कारोबारमा उल्लेखनीय वृद्धि भएको विवरण पनि सार्वजनिक गरेका थिए ।
प्रधानमन्त्रीले सामाजिक सञ्जालमार्फत रुग्ण उद्योग पुनः सञ्चालनका प्रयासबारे जानकारी दिएपछि पूर्वप्रधानमन्त्री प्रचण्डले पनि सामाजिक सञ्जालबाटै त्यसको समर्थन जनाउँदै प्रतिक्रिया दिएका हुन् ।
