मध्यरातमा प्रधानमन्त्रीको अर्थपूर्ण सन्देश : सुनेको र देखेको वास्तविकता होइन, सही समय आउँदैछ

काठमाडौं– प्रधानमन्त्री बालेन्द्र साह (बालेन) ले मध्यरातमा आफ्नो व्यक्तिगत फेसबुक पेजमार्फत सार्वजनिक गरेको छोटो तर अर्थपूर्ण सन्देशले राजनीतिक तथा सार्वजनिक वृत्तमा व्यापक चासो उत्पन्न गरेको छ ।

‘केही समय लाग्छ, सही समय आउँछ । ढिला होला, तर गलत हुँदैन । नआत्तिनुहोस्,’ प्रधानमन्त्री साहले फेसबुकमा लेखेका छन्, ‘सुनेको र देखेकोभन्दा वास्तविकता कहिलेकाहीँ फरक हुन सक्छ । कहिलेकाहीँ एक्लै लड्नुपर्छ । यो पहिलो चोटि होइन ।’

प्रधानमन्त्रीको यो सन्देश कुनै विशेष घटना, निर्णय वा राजनीतिक प्रसंगलाई प्रत्यक्ष रूपमा उल्लेख नगरे पनि पछिल्ला विकसित राजनीतिक घटनाक्रमबीच आएको भएकाले यसको अर्थ र सन्दर्भबारे विभिन्न अड्कलबाजी सुरू भएको छ ।

सामाजिक सञ्जालमा प्रधानमन्त्रीको उक्त पोस्ट केही मिनेटमै हजारौँ प्रतिक्रिया, टिप्पणी र शेयर भएको छ । समर्थकहरूले यसलाई कठिन परिस्थितिमा पनि संयमता अपनाउन गरिएको सन्देशका रूपमा व्याख्या गरेका छन् भने कतिपयले यसलाई सरकारभित्र वा राजनीतिक तहमा देखिएको दबाब र चुनौतीतर्फ सङ्केत भएको हुन सक्ने टिप्पणी गरेका छन् ।

यद्यपि, प्रधानमन्त्री साहले आफ्नो भनाइ कुन विषयसँग सम्बन्धित हो भन्नेबारे कुनै थप स्पष्टिकरण दिएका छैनन् । त्यसैले उनको यो सन्देशले राजनीतिक वृत्त मात्र होइन, सर्वसाधारणमाझ पनि थप जिज्ञासा र चर्चा सिर्जना गरेको छ ।

प्रतिक्रिया दिनुहोस्