विश्व खबर 
काठमाडौं– नेपाल नागरिक उड्डयन प्राधिकरण (क्यान) का तत्कालीन महानिर्देशक प्रदीप अधिकारीले पदमा रहँदा विभिन्न निर्माण कम्पनीलाई अर्बौं रुपैयाँका ठेक्का दिलाइदिएबापत घुस लिई उक्त रकम श्रीमतीको नाममा जग्गा खरिदमा लगानी गरेको खुलेको छ ।
अख्तियार दुरुपयोग अनुसन्धान आयोगले अधिकारीविरुद्ध १ करोड ७१ लाख रुपैयाँ गैरकानुनी सम्पत्ति आर्जन तथा तहीकरण (सम्पत्ति शुद्धीकरण) गरेको अभियोगमा विशेष अदालत काठमाडौंमा आरोपपत्र दायर गरेको हो ।
अख्तियारका अनुसार अधिकारी क्यानमा सिभिल इन्जिनियर (सातौं तह) देखि महानिर्देशकसम्मको जिम्मेवारीमा रहँदा ‘उमा एण्ड कम्पनी प्रालि (जेभीसहित)लाई ३ अर्ब ८ करोड ५७ लाख रुपैयाँभन्दा बढी र प्रेम प्रकाश ढकाल संलग्न ‘गायत्री निर्माण सेवा लाई १ करोड ११ लाख रुपैयाँभन्दा बढीका ठेक्का दिलाएका थिए ।
त्रिभुवन अन्तर्राष्ट्रिय विमानस्थल, पोखरा, गौतमबुद्ध, जनकपुर, रारा, कालिकोट तथा नलिनचोक हेलिपोर्टलगायत आयोजनाका बोलपत्र स्वीकृत तथा सहजीकरण गरिदिएबापत अधिकारीले ठेकेदारहरूसँग १ करोड ७१ लाख रुपैयाँ घुस लिने सहमति गरेको अनुसन्धानबाट खुलेको अख्तियारले जनाएको छ ।
अनुसन्धानअनुसार अधिकारीले घुसको रकम प्रत्यक्ष रूपमा नलिई सम्पत्ति शुद्धीकरण गर्ने उद्देश्यले श्रीमती सुफल केसीको नाममा ललितपुर महानगरपालिका–५ स्थित १३ आना जग्गा खरिद गरेका थिए 
२ करोड ७५ लाख रुपैयाँमा तय भएको उक्त कारोबारमा जग्गाधनी रजनी श्रेष्ठका श्रीमान् सूर्य ताम्राकारको बैंक खातामा ठेकेदारहरूका खाताबाट सिधै रकम जम्मा गराइएको अभियोगपत्रमा उल्लेख छ ।
राजस्व छल्न र गैरकानुनी रकम लुकाउन लिखतमा भने ९१ लाख रुपैयाँ मात्रै थैली कायम गरी मालपोत कार्यालयबाट रजिस्ट्रेशन पास गरिएको आरोप छ ।
बैंक विवरणअनुसार सूर्य ताम्राकारको खातामा उमा एण्ड कम्पनीबाट ५ लाख, सञ्चालक वासु खड्काबाट ४० लाख, सञ्चालकहरूको संयुक्त खाताबाट ४७ लाख, कर्मचारी राजन खड्काबाट १२ लाख र प्रेम प्रकाश ढकालको खाताबाट २२ लाख रुपैयाँ जम्मा भएको देखिएको अख्तियारले जनाएको छ ।
उमा एण्ड कम्पनीका सञ्चालक वासु खड्का र ध्रुवप्रसाद तिमल्सिनाले क्यानको ठेक्का प्रक्रियामा सहजीकरण गरिदिएबापत अधिकारीले भनेको बैंक खातामा एकाउन्ट पेयी चेकमार्फत रकम दिएको बयान दिएका छन् ।
यस प्रकरणमा अख्तियारले प्रदीप अधिकारी, उमा एण्ड कम्पनीका सञ्चालकहरू तथा गायत्री निर्माण सेवालाई प्रतिवादी बनाएको छ ।
अधिकारीकी श्रीमती सुफल केसी नेपाली सेनामा कार्यरत रहेकाले उनीसम्बन्धी कारबाहीका लागि संविधानको धारा २३९ र सैनिक ऐन, २०६३ अनुसार जंगी अड्डामा पठाइएको छ ।
अख्तियारले प्रतिवादीहरूविरुद्ध भ्रष्टाचार निवारण ऐन र सम्पत्ति शुद्धीकरण निवारण ऐनअन्तर्गत १ करोड ७१ लाख रुपैयाँ बिगो, सोही बराबर जरिवाना र कैद सजायको माग गर्दै गैरकानुनी रूपमा खरिद गरिएको ललितपुरको १३ आना जग्गा जफत गर्न पनि मागदाबी गरेको छ ।
