विश्व खबर 
काठमाडाैँ- इरान र इजरायलबिचको बढ्दो तनावका कारण विश्वकै महत्त्वपूर्ण समुद्री व्यापारिक मार्ग स्ट्रेट अफ होर्मुजमा अनिश्चितता कायम नै रहेको छ।
इरान सरकारले यो जलमार्ग भएर जाने जहाजहरूलाई आवतजावत गर्न अनुमति दिन्छ वा दिँदैन भन्ने विषयले अहिले विश्व बजारलाई चिन्तित बनाएको छ।
बीबीसी भेरिफाईको पछिल्लो रिपोर्ट अनुसार यो मार्गमा जहाजहरूको चाप निकै घटेको छ।
समुद्रमा जहाजहरूको स्थिति ट्रयाक गर्ने ’मरिन ट्राफिक’ को तथ्याङ्क अनुसार मंगलबार राति युद्धविरामको घोषणा भएयता नौवटा जहाजले मात्र यो मार्ग पार गरेका छन्।
जसमा दुईवटा तेल र केमिकल बोक्ने ट्याङ्करहरू रहेका छन्। युद्ध सुरु हुनुअघि यो मार्ग भएर दैनिक औसत १३८ वटा ठुला जहाजहरू यात्रा गर्थे।
लगातारको युद्ध र असुरक्षाका कारण अहिले सो क्षेत्रमा करिब ८०० वटा जहाजहरू बिच समुद्रमै अड्किएका छन्।
समुद्री समाचार पोर्टल लोयड्स लिस्टका सम्पादक रिचर्ड मीडका अनुसार द्वन्द्वका कारण यो जलमार्ग लगभग ठप्प जस्तै बनेको छ।
विश्वको तेल आपूर्तिमा मेरुदण्ड मानिने यो मार्ग बन्द हुँदा अन्तर्राष्ट्रिय व्यापार र इन्धनको मूल्यमा ठुलो असर परिरहेको छ।
