विश्व खबर 
काठमाडौं– राष्ट्रिय सभामा विचाराधीन रहेको सामाजिक सञ्जाल विधेयक, २०८१ फिर्ता भएको छ ।
सरकारको विधेयक फिर्ता गर्ने निर्णयलाई राष्ट्रिय सभाले सर्वसम्मतिले पारित गरेको हो ।
सभाध्यक्ष नारायण दाहालले बैठकमा प्रस्ताव प्रस्तुत गर्दै विधेयक फिर्ता भएको घोषणा गरे ।
यसअघि विधायन व्यवस्थापन समितिकी सभापति तुलसाकुमारी दाहालले समितिको प्रतिवेदन पेश गरेकी थिइन् ।
उक्त विधेयक २०८२ भदौ १३ गते दफाबार छलफलका लागि समितिमा पठाइएको थियो, जहाँ ३५ सांसदले १५५ संशोधन दर्ता गरेका थिए ।
सञ्चार तथा सूचना प्रविधि मन्त्रालयले माघ २० मा विधेयक फिर्ता माग्ने निर्णय गर्दै माघ २१ मा पत्राचार गरेको थियो, जसलाई मन्त्रिपरिषद्ले स्वीकृति दिएको थियो ।
सामाजिक सञ्जाल कडाइ गर्ने उद्देश्यले ल्याइएको विधेयक विवादमा परेपछि अघि बढ्न सकेको थिएन ।
नेपालमा सामाजिक सञ्जालसम्बन्धी छुट्टै कानुन नभएकाले अब नयाँ विधेयक ल्याउनुपर्ने अवस्था बनेको छ ।
