काठमाडौं– राजनीतिक दलहरूले घोषणापत्र सार्वजनिक नगर्दै उम्मेदवारहरू घरदैलो र डिजिटल प्रचारमा सक्रिय भएका छन् ।
२१ फागुनमा हुने प्रतिनिधिसभा निर्वाचनमा सहभागी प्रमुख दलहरू कांग्रेस, एमाले, नेकपा, रास्वपा, राप्रपा, जसपा नेपाल, जनमत, उज्यालो नेपाललगायतले अझै घोषणापत्र ल्याएका छैनन् ।
अधिकांश दल घोषणापत्र तयारीको अन्तिम चरणमा रहेको बताउँछन् ।
कांग्रेसले गगन थापा, एमालेले केपी शर्मा ओली र रास्वपाले बालेन्द्र शाहलाई भावी प्रधानमन्त्रीका रूपमा अघि सारे पनि स्पष्ट नीति र योजनासहितको प्रतिबद्धतापत्र सार्वजनिक भइसकेको छैन ।
विश्लेषकहरू घोषणापत्रभन्दा व्यक्तिको छवि र विश्वासका आधारमा मतदान गर्ने प्रवृत्ति बढेको बताउँछन् ।
दलहरूले यसपटक अति महत्त्वाकांक्षीभन्दा पनि कार्यान्वयनयोग्य र यथार्थपरक प्रतिबद्धता समेट्ने दाबी गरेका छन् ।
सुशासन, भ्रष्टाचार नियन्त्रण, रोजगारी, शिक्षा र स्वास्थ्य सबै दलका साझा चुनावी मुद्दा बनेका छन् ।
उम्मेदवारहरू स्थानीय समस्या सुन्दै गर्न सक्ने मात्र वाचा लिएर मतदातामाझ पुगेका छन् ।























