काठमाडौं– प्रतिनिधिसभा निर्वाचनमा यसपटक पनि भ्रष्टाचार, सम्पत्ति शुद्धीकरण, सहकारी ठगी, हत्या आरोपलगायत मुद्दा खेपिरहेका व्यक्तिहरूलाई दलहरूले उम्मेदवार बनाएका छन् ।
अदालतमा मुद्दा विचाराधीन रहेकाले जिते पनि सांसद पद निलम्बन हुने वा संसद् छिर्न नपाउने अवस्था भएका व्यक्तिहरू अघि सारिएका हुन् ।
नेकपाबाट रौतहट–१ का उम्मेदवार माधवकुमार नेपाल पतञ्जलि जग्गा भ्रष्टाचार मुद्दामा प्रतिवादी छन् ।
कांग्रेसबाट मनाङका उम्मेदवार टेकबहादुर गुरुङ विशेष अदालतबाट दोषी ठहर भइसकेका छन् ।
रास्वपाका सभापति रवि लामिछाने चितवन–२ बाट उम्मेदवार हुँदै सहकारी ठगी, सम्पत्ति शुद्धीकरण र संगठित अपराधका मुद्दा विभिन्न अदालतमा खेपिरहेका छन् ।
एमालेले महोत्तरी–१ बाट लक्ष्मी महतो कोइरी र गोरखा–२ बाट ‘चक्रे मिलन’ भनिने मिलन गुरुङलाई उम्मेदवार बनाएको छ ।
कांग्रेसका विजयकुमार गच्छदारविरुद्ध ललिता निवास प्रकरण सर्वोच्चमा विचाराधीन छ ।
यस्तै, शरणार्थी र टेरामक्स प्रकरणमा मुछिएका केही नेताहरू अन्ततः उम्मेदवार सूचीबाट हटाइए ।
दागी व्यक्तिलाई उम्मेदवारीबाट रोक्ने स्पष्ट कानुनी व्यवस्था नहुँदा दलहरूले यसको फाइदा उठाउँदै आएका छन् ।
निर्वाचन आयोगले स्वघोषणा फाराममार्फत मुद्दाको विवरण लिने व्यवस्था गरे पनि कानुन संशोधन सरकारबाट अघि बढेको छैन ।























