विश्व खबर 
काठमाडौं– नेपाल टेलिकमले विद्यार्थीवर्गलाई लक्षित गर्दै किफायती दरमा उच्चगतिको इन्टरनेट सेवा प्रदान गर्ने ‘NT Fiber Vidhyarthi Offer’ सुरु गरेको छ ।
२०५४ साल वा त्यसपछि जन्मिएका विद्यार्थीका लागि लागू हुने यो अफर आज सञ्चार तथा सूचना प्रविधि मन्त्री जगदीश खरेलले टेलिकम केन्द्रीय कार्यालयमा आयोजित कार्यक्रममा शुभारम्भ गर्नुभयो ।
मन्त्री खरेलले आर्थिक रूपमा सक्षम नभएका विद्यार्थीका लागि सूचना प्रविधिमा पहुँच सुनिश्चित गर्न नेपाल टेलिकमले गरेको प्रयास सराहनीय रहेको उल्लेख गर्दै जनतालाई सुसूचित र सम्पर्कमा राख्ने भूमिकामा कम्पनीको योगदान प्रशंसनीय रहेको बताउनुभयो ।
कम्पनी सञ्चालक समितिका अध्यक्ष तथा सचिव राधिका अर्यालले नेपाल टेलिकम नाफा भन्दा पनि सेवालाई प्राथमिकता दिने संस्थाको रूपमा काम गर्दै आएको बताउँदै राजस्व वृद्धिसँगै सेवा विस्तारमा जोड दिन आग्रह गर्नुभयो ।
अफर अन्तर्गत विद्यार्थीले करसहित रु. ४,९९९ मा ३० एमबीपीएस इन्टरनेट सेवा एक वर्षका लागि प्राप्त गर्न सक्नेछन् ।
यसमा रु. ५०० जडान शुल्क लाग्नेछ भने १ थान Dual Band CPE र बढीमा १०० मिटर ड्रप फाइबर निःशुल्क प्रदान गरिनेछ।
विद्यार्थीहरूले यो अफर माघ २२ गतेसम्म आवेदन दिन सक्नेछन् ।
आवेदनका लागि विद्यार्थी परिचयपत्र, जन्ममिति खुल्ने प्रमाणपत्र, र नाबालिगको हकमा अभिभावकको नागरिकता वा पासपोर्ट प्रतिलिपि अनिवार्य हुनेछ ।
अफरको विस्तृत जानकारीका लागि www.ntc.net.np http://www.ntc.net.np वा ग्राहक सेवाकेन्द्र १९८ मा सम्पर्क गर्न सकिनेछ ।
