काठमाडौं– नेपाली कांग्रेसको पदाधिकारी बैठक आइतबार बिहान ललितपुरको धोविघाटस्थित एक होटलमा कार्यवाहक सभापति पूर्णबहादुर खड्काको आह्वानमा बसेको छ ।
बैठकमा आगामी महाधिवेशनको कार्यतालिकाबारे सहमति जुटाउने एजेन्डा छ ।
शनिबारको बैठकमा सहमति नजुटेकाले आज पुनः छलफल भइरहेको हो ।
महामन्त्री गगन थापाले कार्यतालिका नल्याए केन्द्रीय समिति बैठकमा नबस्ने बताएका छन् भने अर्का महामन्त्री विश्वप्रकाश शर्माले पुस १६–१९ भित्र १५औं महाधिवेशन गर्नुपर्ने अडान लिएका छन् ।
सभापति शेरबहादुर देउवा पक्ष भने वैशाख अन्त्यतिर महाधिवेशन गर्न सकिने पक्षमा छ ।
५४ प्रतिशत प्रतिनिधिले हस्ताक्षरसहित विशेष महाधिवेशन माग गरेपछि कार्यवाहक सभापति खड्का दबाबमा छन् ।
शनिबार गुरूराज घिमिरेलगायत नेताहरूले सानेपामा खड्कालाई भेटी तत्काल कार्यतालिका नल्याए विशेष महाधिवेशन प्रक्रिया अघि बढाउन आग्रह गरेका थिए ।
आज दिउँसो १ बजे सानेपामा केन्द्रीय समिति बैठक बस्ने तयारी छ भने मंगलबार विशेष महाधिवेशन पक्षधर नेताहरूको भेला हुने भएको छ ।























