विश्व खबर 
काठमाडौं– नेपाली कांग्रेसको केन्द्रीय समिति बैठक स्थगित भइरहेका बेला संस्थापन पक्षले शनिबार ललितपुरको सिद्धार्थ होटलमा गोप्य भेला गरेको छ ।
कार्यवाहक सभापति पूर्णबहादुर खड्काको संयोजनमा भएको भेलामा शेरबहादुर देउवा समर्थक नेताहरूले आगामी रणनीति र महाधिवेशनको समयबारे छलफल गरेका थिए ।
बैठकमा विशेष महाधिवेशनको मागसहित सुरु भएको हस्ताक्षर अभियानबारे गहिरो विमर्श गरिएको स्रोतले बताएको छ ।
सहभागीहरूका अनुसार संस्थापन पक्षले मंसिरभित्र महाधिवेशन गर्न नसकिने निष्कर्ष निकालेको छ ।
छलफलमा कृष्ण सिटौला, विमलेन्द्र निधि, बालकृष्ण खाँण, रमेश लेखक, एनपी साउदलगायत नेताहरू सहभागी थिए ।
शंशाक कोइरालासमेत उपस्थित रहेको भेलामा हस्ताक्षर अभियान फिर्ता गराउने र महाधिवेशनको म्याद लम्ब्याउने विषयमा पनि कुरा भएको बताइन्छ ।
यद्यपि दलीय विभाजनबारे पनि सामान्य छलफल भएको थियो ।
तर, खड्काले विभाजन खतरा हुने भन्दै यसबारे छलफल गर्न चाहेनन् ।
महामन्त्री गगन थापा र विश्वप्रकाश शर्माले मंसिरभित्रै १५औं महाधिवेशन गर्नुपर्ने मागसहित हस्ताक्षर सङ्कलन गरेका छन् ।
असोज २९ गते २,४८८ प्रतिनिधिको हस्ताक्षर कार्यवाहक सभापति खड्कालाई बुझाइएको थियो, जसले कांग्रेस विधानअनुसार विशेष महाधिवेशन बोलाउन दबाब सिर्जना गरेको छ ।
प्रतिक्रिया दिनुहोस्